Forest Department-i Kohima nung oset lemtsü

Dimapur, Aami/June 18 (TYO): Department of Environment, Forests and Climate Change, Kohima Forest Division ajanga Kohima Range Office nung June 18, 2019 anogo nüburtem nem oset (community assets) lema agütsüba sentong ka ayongzüka agi.
Iba sentong nung DFO Kohima Rongsenlemla Imchen-i, yimdaklirtemi arem aser tzü-mopung wazüka ayuba nung tongtibang shilem agiba indang rasaa ashi. Lai sentong nung adenertem dang parnok nem lemzüktsüba osettem kanga kümdanga nüburtem ajangzüktsü asoshi amshitsü ajungshia liasü.
Ali rongsen ketdangsüba nung tongtibang shilem agiba asoshi lai yimtsüng nung lokti tentet balala, JFMC aser SHG tem nem tenüngsang agütsü. Kasa sentong nung yimtsüng nungi lokti tentet temia department-i region nung tzü-mopung wazüka ayutsü asoshi awareness sentongtem ayonga agiba asoshi pelaba shisem aser department den akok tashi yariteptsü shia liasü.
Iba sentong ya Pezaneinuo, Ranger Kohima ketdangsüa agi, kong lai sentong nung adener dang FDA kübok yimdaklirtemi süngtong-litong atemba anepalutsü ajungshia liasü. FDA Kohima indang entry point inyaksangshi kübok department ajanga plastic chair, barbed wire, solar lamp aser eco friendly waste bin tem lema agüja liasü, ta ketdangser sangdong ka ajanga ashi.