Four Nations Hockey asayamung nung India final tongogo

Tauranga, Aenjeti 20 (Agencies): Küptoknü (Saturday) Four Nations Invitational asayamung nung India nunger asoshi tasembuba asaya New Zealand den asayaba nung India-i 3-1 agi New Zealand madak takok ngua final tongtetogo.
India nunger teburtem hockey asayartem rongnungi Harmanpreet Singh, Dilpreet Singh aser Mandeep Singh nungeri iba asaya nung goal kaka agütsü aser New Zealand pur atema Kane Russell-i dang goal ka agütsütet. India telok ya Olympic silver medallist, Belgium den Amungnü Blake Park nung final asayatsü. Belgium-i semi-final nung Japan madak 4-1 agi koka lir.
New Zealand team-i final tonga asayatsü atema draw match ka kanga dang nüngdaka liasü, saka World No. 6, India-i tsükdaktsü. Asaya tenzüker minute 2buba nung penalty corner ka ajanga Harmanpreet-i mezüngbuba quarter nung goal ka agütsü. Tanabuba quarter asayaba mapang tashinung Dilpreet-ia minute 21buba nung goal ka agüja India nunger goal 2 tashi ngüa liasü.
First half tashinung New Zealand nungeri goal ka danga mengütsüteti 0-2 nung aliba mapang, parnoki asayaba yimya melenshia India nunger defence madak kanga dang meranga asaya saka takok mangü. Ajisüaka, tasembuba quarter asyaba mapang, Russell-i minute 45buba nung penalty corner ngua goal ka agütsü.
India nunger striker Mandeep-i minute 47buba nung tasembuba goal ka agüja New Zealand nunger teimla samatsü. Iba asayamung nung India nunger asemben asayaba nungi anaben tashi akoker asütsü.
Hockey World League nung India nungeri bronze medal ngur aliba mapang ka nung iba asayamung tenzüka asayaba nung taoba Rasemnü Japan nunger madak 6-0 agi takok ngüa liasü. Ajisüaka, Yangtepnü tanabuba asaya nung World No. 3, Belgium nunger den 0-2 agi tamakok ngua liasü aser Küptoknü New Zealand nunger madak takok ngütet.