FPAI puri ISL Team tem nung bendanglen nungi asayartem tajemba asayadaktsüner

Kolkata, June 6 (Agencies): Bodhbarnü Asian Football Confederation (AFC) headquarters, Kuala Lumpur nung stakeholder tem ajak senden ka akaba mapang, tanga onüktem den külemi tongtibangsa ISL nung bendanglen nungi asayartem tang 6 asayaa aliba ya tajemba kümdaktsütsü asoshi asüngdangtsü atema Football Players Association of India (FPAI) sentong lir.
Hombarnü senior football asayartem den senden ka akaba mapang taoba All India Footbal Federation (AIFF) tir aser advisor Bhaichung Bhutia aser Renedy Singh nati tebilemtsü balala aser FPAI tamendakdak lemsatepba, general manager Cyrus Confectioner-i osangbenertem nem metetdaktsü.
“Tebilemtsü tulutibaji asayartem mapa manguba ya lir. Onoki I-League aser Indian Super League na ka küma longjemer mesüra külemi inyakdaktsüner. ISL nung playing eleven nung India nunger football asayar timba anioka asayadaktsütsüba ken o, Kuala Lumpur nung senden akaba mapang benoka jembitsü asoshi sentong lir,” ta Confectioner-i ashi.
“Onoki FSDL (Football Sports Development Ltd) dangi iba onük benoka züluogo saka tang tashi kecha telangzüba mali. Kodaser ISL nung India nunger asayar 40-i Indian football yaritsü? ISL nung team aser India nunger asayar timba nüngdaker,” ta pai shisem.
Mongolbarnü Bhutia aser Renedy na iba senden nung adentsü, ta Confectioner-i ashi.
Taoba India captain Bhutia-i Deobarnü osangbenertem dang ashiba agi, “ISL aser I-League na longjemtsüla aser Indian football ajangzüktsü asoshi team 20 asaymong ka mapang talangka agia parnok o parnok na tsüngda asayatsüla. Tangbo league ka ita pezü shi asayar aser iba sülen ita pezü ponguka lir tanabuba league asaya tenzüker. Iba ajanga football asayartem majangzüker.”
“Asaymong anprongla külemi mapang ka nung asayara asayar timba asayamong tulu nung asayatsü asoshi maongka angutsü. Iba ajanga India nunger football asayartem asayatsü maongka mongoi aliba tebilemtsü agintsü aser parnok nem tajangzük agütsütsü, kechiyong asayar ka atema küm 15 shi dang asayateter koba mapang kanga tatsüka dang lir,” ta paisa shisem.
Hombarnü senden nung tangarden külemi ano Mohan Raj, Mehtab Hossain, Arindam Bhattacharya, Alvito D’Cunha, Naseem Akhtar aser Anit Kumar Ghosh nunger densema liasü.