‘Framework Agreement’ ji tesentaktep tasen ka atema tamendakdak lir : Th Muivah

Dimapur, March 21 (TYO) : NSCN (IM) aser India sorkar tsüngda August 3, 2015 nü ‘Framework Agreement’ sign sütepbaji linük ana tsüngda tesentaktep tasen ka yanglutsü atema tamendakdak lir, ta NSCN (IM) General Secretary aser Chief Negotiator, Indo Naga Peace Talks, Th Muivah-i tanü ashi.
“Küm talangka olemtepa aruba sülen, India sorkar aser NSCN tsüngda otsüsütsü aketba Framework Agreement agitsü lemtet” ta tanü NSCN(IM) indang 38 buba Republic Day sentong nung o jembidang Muivah-i ashi.
‘Framework Agreement’ ya Naga nunger temeten aser India indang security akhümtsübutepa agiba lir. Anungji, nisung ajaki khuret talila madokdaktsüi tang aliba khuret nung temulung agüja inyaktsü ayongzüker, ta paisa shisem.
Iba sentong nung NSCN-IM, vice president, Gen. (Retd) Kholi-i tongti tesemdanger ama shilem agi aser pa indang official secretary kati pa indang osang zünga metetdaktsü.
“Asenok sasa khurettem adokdaktsür aser Nagalim nung kati ka anema raratsü atema Naga yimten telok tasentem tentetba ajanga khuret tuluba kümdaktsür. Asenoki asen mangatetteptem toktsür asen linük yangertsü asoshi tang ya mapang tajung ka lir. Tarutsü atema bilema asenoki tanü mapa inyakdi,” ta Gen. (Retd) Kholi-i ashi.
Tanü sentong nung Gen. (Retd) Kholi-i linük wako salatsü.
Sentong nung Nagaland GBs Federation, Naga Hoho, Naga Students Federation, Eastern Naga Public Organisation aser United Naga Council nungi lennirtemi den Arunachal Pradesh nungia lennir kati o jembi.
38 buba Republic Day sentong nung Pastor, CHQ. Rev. D. Heutui Zeme-i tasürtem bilemteta tetushi agütsüba mapang agi.
Sentong nungsa Alobo Naga aser Ajano nungeri ken aten, Naga army-i drill display aser Yimchunger Dance Troupe, Old Showuba village-i yartsüngsang ka ajanga shilem agi.