‘Framework Agreement’ nung Naga nunger ajak dena lir

Dimapur, May 12 (TYO) : Naga nungertemi yimten nüjiso asoshi tashi ajak agi rara arur külen India den tajung agi jembia yimten tebilemtsü ya teti asoshi latettsü atema India government o NSCN-IM na tsüngda yimjung yangluba sülen ‘ Framework Agreeement ‘ ka yangluogo. Iba Agreement yagi Naga nunger lushi aser Naga nunger ajak amsema lir ta sangdong ka ajanga NSCN-IM nung inyaker rongnung Nagaland nung alirtem nungi Steering Committee züngsemtem den kilonsertemi metetdaktsüogo.
Iba Agreement yagi Naga nunger o India nunger na prongla dak yimten nüjiso akatsüba temeten lir ta agizükba tangatetba ka sayur aser ano iba Agreement yagi Naga nunger ayak aser alushi dak aketba temeten indang shitaka ta agizükba sayur ta parnokisa ashi.
Iba tangatetba nungji amendaker, Naga nunger o India nunger na tsüngda yimten tashi lemsatepa külemi abentsü asoshi tangatetba ka agizüktepa jembibaji shisataka mapa ka asütsü, kechiyong iba jagi dang teti atema kin anapronglai agizüktettsüsa telemtetba kati arutettsü ta parnokisa ashi.
Iba Agreement dak ajemdaker, telemtetba kati arudang, Naga nunger asoshi parnok rongsen, shisatsü tekolok, tanülaren aser loktiliba ajak tejakleni renloka aotsü teimla tulu lir ta Nagaland nung alir NSCN-IM nung lenirtemisa metetdaktsü.
2015 küm August 3 nü Naga nunger yimten tebilemtsü latettsü asoshi ‘Framework Agreement’ yangluba atema Naga nungertemi ato kilonser Narendra Modi, India tenüng nung NSCN den ken o jembir R.N. Ravi, taoba NSCN Yuruiwo, Asür Isak Chishi Swu aser NSCN/GPRN nung ato kilonser,. Th. Muivah nungertem ajak dang Naga nungertemi kanga pelatsüsa kuli aika lir ta NSCN-IM nung lenirtemisa ashi.
Iba Framework Agreement yagi raratepa aser aitsütepa aliba nungi teputep nung ken o jembitsüba yimten tangatetba kati arudaktsü aser arür agi tembar aküm ta parnokisa metetdaktsü. Tang iba ama mapang ka nung Naga nungertemi telemtetba kati marutet nungbo Tsüngremi agütsüba mapang tajung ka malangzüktetter asütsü ta parnokisa ashi.
Ano külen India o Naga nunger na tsüngda yimjung nung yimten ken o jembia aliba maparen ya raksatsütsü atema nisung kari Naga nunger meputepdaktsütsü merangba angur, ajisüaka India o NSCN na pronglai item tenokdangbatemji kokteta telemtetba kati arutettsü imlar ta parnokisa metetdaktsü.
Naga nungertemi kidang kiyonger anema tamajung bilemba kecha mali, Naga nungertemji parnok den yaritepa aliba nissungtem lir. Naga yimten tebilemtsü ya yimten nüchiso aser arrtsü dak aketba ken o lir, anungji ajak den yimjung nung alitsüsa telemtetba tajung ka agitsü imlaa atar ta parnokisa ashi.