“Framework Agreement” ya okila asütsü:T.R.Zeliang

Manipur state kübok Senapati district nung Bodbar nü Naga nunger senden ka nung Nagaland Chief minister, T.R.Zeliangi jembiba noksa nung angur. October 19, 2016.

Kohima, Oct. 19 (TYO) : Nagaland Chief Minister T.R Zeliang-i ashiba agi, 2015 küm August 3 nü India government o NSCN-IM na tsüngda “Framework Agreement’ yangluba ken o nung aliba onüktem nübortem nem yimjak nung memetetdaktsüaka, India government tenüng nung NSCN-IM den jembir RN Ravi-i iba ‘agreement’ nung aliba onüktem ajak Naga nunger kin balala tentettem dang rasaa shiogo, aser iba ken o ji Naga yimten tebilemtsü onük ya tatem küma latettsü asoshi tetuyuba agütsüba okila ka dang asütsü.
“Ni angatetba agibo, August 3, 2015 nü renemba framework agreement ya okila ka dang, ibaji ajanga telok ana tsüngda tashiyim mamshii tangatettep nung Naga nunger yimten otsü aser temeten wazüka ayutsü aser India den yimten tashi lemsatepa abentsüsa Naga yimten telatetba ka dangi arutsü asoshi renemba ken o ka lir,” ta Wb.T.R.Zeliangisa metetdaktsü.
Pai iba o ya tanü Manipur state kübok aliba Naga nungertem “1st Conference of the Naga Village Authority of South Nagalim,” sentong Senapati (Tahamzam) kübok Tagaramphung local ground nung nisung meyirijang aika adenshia allidak jembidang metetdaktsü
“Nüngdakba pur ajak den shisalemsatepba sülen dang teti atema Naga yimten telatetba katibo arutettsü, anungji tang ama center nung ato kilonser, Narendra Modii anir Naga yimten telatetba ka dangi arutsü asoshi mulungsua inyakba mapang, akok tashi tekaratiba nung telatetba kati arutsü merangtsüla aser asenok lenir shirnoki India government den jembidagi, parnok dak tamang akatsüla,” ta T.R.Zeliang-isa metetdaktsü.
Naga nungertem kong lidir liaka longjemer pei lima aser pei sobaliba kümzüka ayutsü asoshi nokdaktetra kecha yimten tashiia Naga nunger telongjem meraksatsütettsü aser asenok temeten bener moutettsü ta paisa ashi.
“Iba ama Naga nunger longjema aliba ajanga Manipur state nung terenlok mapatem inyabaren nung liromedema akümtsü aser lendenlen alir o tenem nung alir na tsüngda yimten nunga shilem kasasa angutsüsa inyaktettsü ,” ta Zeliang-isa ashi.
Naga People’s Front (NPF) indang ashidang, “NPF telok ya Naga nunger telongjem asoshi dang masü saka North East nung aliba kintem asoshi inyaker,” ta paisa metetdaktsü.
“Manipur nung yakta Assembly Election agitsü alinungji, Naga nunger ajak NPF kübok longjemer ano tanga kintem dena tangatettep nung inyaktsüla, iba jagi dang Manipur nung tribal nisungtem anema temzüng ozüngtem yanglua aliba anema nokdaktettsü,” ta Zeliang-isa metetdaktsü.
“Tanü lima nung yimten temeten asoshi injang prangpong amshia raraba mapatem ajak toktsür yimjung nung yimten telatetba kati arutsü lenmang bushiba mapatem ajak pelashishia agizüker, ajisüaka Manipur government-i yimten telok balalai India government den yimjung nung yimten ken o jembitsü lenmang lapokba mapatem magizüktetba ya mangatetter. Naga yimten temeten India den jembiba agi Manipur nunger makoksatsü,” ta Nagaland Chief minister-isa metetdaktsü.
Paisa ashiba agi, Nagaland government-i NSCN-K telok danga India government den yimjung nung ken o tenzüka jembitsü maneni ajungshir aser Myanmar dena yimjung nung lidaktsüner.
Nüngdak süra Naga yimten latettsü atema India government o Myanmar na jembidaktsütsü ta paisa ashi.
Tanü iba senden nung Chief Minister den minister Tokheho Yepthomi aser Yitachu na den Parliament (Rajya Sabha) tatar KG Kenye nungertem liasü.