France Defence Minister, Drian-i Cairo semdanger

Cairo, July 25 (Agencies): France Defence Minister, Jean-Yves Le Drian-i tanü Honibar nü nungi tenzüka anogo ana asoshi Cairo semdangtsü tenzükogo.
France nungi Rafale fighter jet tayimtsü 24 tashi euro sen billion 5.2 agi alizüktsü tezüngzüktep agiba ama, France-i mezüngbuba shilem, tayimtsü 3 tashi Egypt tongtsür anogo ishika lir külen Drian-i tan Egypt semdanger lir.
Africa kübok densemba linüktem semdangtsüren tenzüka alisang, Drian-i tan Egypt semdangdang, Egypt Tir, Abdel Fattach al-Sisi densema tongti Egypt ketdangsertem den ajuruteptsü sentong renema lir.
Egypt anülulentip tsütsü Libya nung tensa kanga mejungi akümba den külemi, Sinai Peninsula nung Islamic State (IS) ta ajaba kiralongrar teloki lendong tsüngdong kanga sashia atalokdaktsütsü tenzükba ngua par mitkar tashi tali itshitsütsü nükjidong nung Egypt-i Rafale jet tayimtsütemji France nungi alizüker lir.
Egypt-i Rafale tayimtsü 24 denji külemi, tongpang nung amshitsü missile-tem alizüktsü asoshi France den tezüngzüktep agiba osang jangjaogo.
“Ozü lenir, Drian-i Egypt semdangdang Egypt nem Rafale tayimtsütem tongtsüba den sentakba onüka Egypt lenirtem den benoktsü sentong renema lir,” ta Drian-i Egypt tonga aoba jakdang France sorkar ketdangser kati metetdaktsü.
Drian-i tanü Cairo yimti tonga aoba sülen Egypt Defence Minister, Sedki Sobhi den ajurutepa senden amenba osanga jangjaogo.
Libya madak tashiyim agi yimsü asüsang, Moamer Kadhafi’er yimli taoba mapang, 2011 nung jirepba sülen Libya madak yimsü asütsü tashi ngutettsü asoshi telok ana tashi tenteta kanga sashia raratepba ajanga Libya nung tang makmakshimak tulu adoka tensa kanga mejungi akümba osang bushiteta lir.
IS teloki Egypt nunger Coptic Christan-pur 21 tashi tekong tangja tepsetba video internet ajanga sayuba sülen Egypt-i par mitkartem Libya telungi yoka IS teseptem tan February ita amakba osanga bushitetogo.
Yamaji atalokba sülen, Egypt-i ayonger külen, Libya nung alir kin balala nungi lenirtem den anogo 4 agia senden ka taküm May ita mena par Libya linük nung raraba anenja yimji yimjung tia bener arutsütsü den sentakba onük benokba jembiba osanga bushiteta lir.