France election:Le pen-i sen tapu ana amshitsü benok

Paris, April 30 (Agencies) : France far-right National Front lenir aser tan linük Tir election nung tokteper candidate, Marine Le Pen-i, France nung sen tapu ana amshitsü benok — ka linük telung nung amshitsü aser ka bendanger linüktem den shishilemba dang amshitsü — kechiba süra lai euro joko süogo ta bilemer, ta Deobarnü ashi.
“Tanga linüktem amai linük telung nung amshitsü atema sen balaka aser ka International nung amshitsü,” ta asübaji lai France osangbenertem den jembiba mapang ashi.
Lai shinübaji French franc ji linük telung nung amshitsü aser euro ji international company tulutem den shishilemba dang amshitsü.
May 7, 2017 nü France Tir election shilem tanabuba nung Emmanuel Macron den tokteptsü alila Le Pen-i, “France nung mapa manguba ya Euro dak tuluka keta lir kechiba süra euro amshiyim ya France rongsenkettsüng nung ano yimya mesüba, ta ashiba osangbenertemi metetdaktsü.
Ni Tir election nung takok angu nungbo ni European Union (EU) den nüngdakba pezü — tesem kümzüka terenlok mapa inyaktsü, yimsüsübaren, rongsenkettsüng aser sen inyakyim tsütsü olemtep akatsü, saka iba olemtep nung EU-i tamakok aludaktsüra euro dak sendakba tebilemtsüji France nüburtem nem vote ajanga bentetdaktsütsü, ta lai shisem.
“Vote agitepba mapang nüburtemi, ‘nunga’ ta vote süra ni mapa nungi anentsü,” ta Tir akümtsü teimla alila, Le Pen-i ashi.
Le Pen-i euro toktsütsü benokba ajanga nüburtem koda masü kümdaktsüogo. France nunger noklang nung shilem 70-i Euro amshiner.
Lai euro komaser kechi tasa ka agi toktsütsü ibaji atema lar Front National party dena mangmangteper.
Lai ano linük nung tang benshia aruba inyakyim kar melenshitsü shiogo aser item temelenshi nung immigrant tanurtem nem angadi kaketshisatsü agütsüba shibangtsü dena lir.
Tang Tir meden angutsü jenjang tajungba nung alisang Macron ji Le Pen-i koka la Tir akümtsü amai lai kanga temulung lema bilemer.