France & Europe nung kiralongratsü sentong lir: Manuel Valls

France yimtiba, Paris kübok Sorbonne University nung ayongba tawa lendong nung asür aser yirur nisungtem nem aküm agütsüba sentong nung France Higher Education & Research Minister, Thierry Mandon; Education Minister, Najat Vallaud-Belkacem, Tir Francois Hollande aser Ato Kilonser, Minister Manuel Valls (Abelen nungi achijileni tarensena) nungeri tanü Hombar nü shilem agiba noksa nung angur. (Paris, November 16)

 Paris, November 16 (Agencies): France densema tanüngba Europe nung tentetba linüktem nung tawa France kübok Paris yimti nung atalokdaktsüba amala lendong atalokdaktsütsü asoshi kiralongrartemi sentong tasen renemba osang ka France Ato Kilonser, Manuel Valls-i tanü Hombar nü metetdaktsüogo.

“France nung dang masü saka tanüngba Europe kübok tentetba linüktem nunga lendong balala atalokdaktsütsü asoshi kiralongrartemi sentong renemba osang angazükogo,” ta pai ashi.

“France-i taoba mapang lendong aika paidoka aruogo. Ajisüaka, France-i tawa ajuruba amala lendong tesashi tarutsü mapang nunga ajurutsüa kiralongrartemi sentong renemtsü tenzüka lir. Nüburtem tsübodaktsütsü atema masü saka parnok tali kümdangshia lidaktsütsü tangatetba nung ni iba osang ya lemsateper,” ta Valls-i shisem.

Ano külen, Belgium nunger Abdelhamid Abaaoud-i tasa ajunga atonger külen tawa Paris nung lendong atalokdaktsüba osang jangjaba osang ka France sorkar ketdangsertemia tanü metetdaktsüogo.

Taküm, 2015 küm tetenzüklen Belgium police ketdangsertem amaktsü merangba ken o nung ajemdaker Belgium sorkari tang Syria nung jenoka alisang, Abaaoud aputsü ozüng adokja aliba osang bushiteta lir.

Abaaoud ya Morocco nungi arua Belgium nung alir ka aser pai Belgium kübok Verviers yimti nung tentetba Islamic State (IS) telok lenisang menden abenba osang bushitetogo.

Ano, tan Paris nung lendong atalokba sülen par police ketdangsertemi kiralongrar mitsü mapatong 150 dak tema agiba osang ka Valls-i tanü metetdaktsü.

Paris kübok Toulouse, Grenoble, Jeumont, Lyon aser Bobigny kiyongtem nung tan mitsü maparenji inyakba sülen kiralongrar ta temulung malemba nisung 10 dak tema apuba den külemi, rocket launcher, Kalashinikov rifle aser bulletproof tola densema tongpang nung amshitsü osettsüset jenti bena aruba osang tang tashi nung jangjaogo.

France Tir, Francois Hollande-i anir külen France lenirtemi tan lendong nung asür nisung 129 aser yirur nisung 250 dak tema nem tanü aküm agütsüba osanga jangjaogo.