France-i 2015 lendong nung asür nem aküm agütsür

France Tir, Francois Hollande (Abelen) aser France Ato Kilonser, Manuel Valls (Achijilen) nati Paris kübok Place de la Republique nung ayongba 2015 küm atalokba lendong nung asür nem aküm agütsüba sentong nung narozük ka yuja shilem agiba noksa nung angur. (Paris, January 10)

Paris, January 10 (Agencies): France nunger nisung meyirijang jenti taoba 2015 küm Charlie Hedbo osangkaket aser Yihuda nunger shishilembadak lendong nung asürtem bilemteta parnok nem aküm agütsüba sentong ka Paris yimti nung tanü Deobar nü agiogo.
Yaküm January ita atalokba lendong nung ajak agi nisung 17 tashi kiralongrartemi tepseta liasü.
Tanü sentong nung shilem agirtemi yaküm November ita atalokba lendong nung asürtem nema aküm agüja liasü.
Muslim nunger kiralongrartemi nisung 130 tashi tespseta Paris nung lendong atalokdaktsüba sülen France nung tanga emergency ozüng benoka lir.
Tanü Paris kübok Place de la Republique nung agiba sentong nung France Tir, Francois Hollande aser Paris yimti Mayor, Anne Hidalgo natia shilem agia asür nüngtem nung renemba nungshilong ka sayaja liasü.
Ano külen, tamangba yimsü balala benshir dang Muslim tesayuba sayutsü nükjidong nung France nung tentetba mosque-temi nüburtem jaokba osang ka angazükogo.
France nung tentetba tongti Muslim tentet, French Council of the Muslim Faith (FCMF)-i ayonger külen iba sentong ya tenzüka lir.