France-i int’l yimjung mongdang ayongbaji mapang intokerba dang:Hamas telok

Gaza, April 24 (Agencies) : Islamic Hamas teloki, France-i küm aika rara aruba linük ana, Palestine aser Israel atema international yimjung mongdang ayongbaji amajok nung mapang intoker dang asütsü, ta Deobarnü metetdaktsü.
Hamas otongdar Sami Abu Zohri-i, yimjung atema sentong atonga aliba ajakji amajok dang asütsü aser Palestine nunger atemabo iba yimjung mongdangji jilushi aiba sentong ka amai asütsü, ta Xinhua news agency osangbenertem dang ashi.
Paisa ashiba agi, “Iba ama sentong ayonga amongdang teti Palestine nunger meyong Israel nungeri amanglema aliba tesem atema jembir saka kecha süngjang matanger aser ibaji ajanga yimjung sentong ajak amajok dang asür.
Hamas otongdar Sami-i, Palestine linük nung ketdangsertemi iba ama sentong ajanga tajangzük kecha magütsür aser joko tatembang kati aruogo ta jangja meteta liakasa linük nüburtem anisatsü atema odang kadaktsür, ta metetdaktsü.
Chief Palestinian negotiator Saeb Erekat-i, France-i yimjung mongdang May 30, 2016 nü amongtsü ayongba sentong pelashishia agizükogo. Iba mongdang nung Arab aser Europe linük tem nungia shilem agitsü, ta ashi.
France-i ayongba iba yimjung mongdang takok ngua katettsü asoshi international lokti ajaki nüngittsüla, ta Erekat-i ashi.
Israel nung France nungi ambassador, Patrick Maisonnave-i, “Ni Israel Ato Kilonser office nunga iba sentong nung arua adentsü atema shiti ka agütsüogo,” ta ashiba Israel radio osang ajanga metetdaktsü.
2014 April ita nungi Israel aser Palestine na tsüngda yimjung akatsü jembia arur. U.S.-i ayonga olemtep agiba sülen ano ita toku dang lir linük ana tsüngda mepet mesü tanaben tenzük.