France-i IS nem tapet telangzüba agütsütsü: Hollande

France kübok Paris yimti nung IS teloki yasüng, Hokolbar aonung lendong kanga sashia atalokdaktsüba sülen France police ketdangsertemi Paris kübok Eiffel Tower anasa duty inyakba noksa nung angur. (Paris, November 14)

Paris, November 14 (Agencies): France linüki Islamic State (IS) kiralongrar telok nem tapet telangzüba agütsütsü tenangzükba olen ka France Tir, Francois Hollande-i tanü Honibar nü kanga jashia metetdaktsüogo.
IS züngsemtemi France kübok Paris yimti tesem 6 tashi nung yasüng, Hokolbar aonung lendong kanga sashia atalokdaktsüba sülen Hollande-i tanü iba olenji sangoktsü.
IS teloki tan atalokdaktsüba lendong nung ishiba agi nisung 127 asüba aser nisung 200 dak tema yiruba osang tang tashi nung jangjaogo.
Ano, yasüng lendong atalokba sülen Hollande-i rongdak security senden ka ayonga amenba sülen par linük ajungai anogo 3 tashi mangyimtsü lemtetba osang jangjaogo.
“IS teloki ozü France nung lendong atalokdaktsüba den tapet telangzükba ozü France-i agütsütsü. IS kiralongrar teloki tan lendong atalokdaktsüba ya World War II tongpang sülenbo ozü France-i lendong tesashiba ajurur lir,” ta Hollande-i nenshia ashi.
“Ozü France-i IS telok dang khenyongi taochi mesayui taoba mapang nung kanga agi tesashiba raratsü nangzüker,” ta tang Syria aser Iraq na nung tentetba IS telok anema rarabaren nung US-i aniba alima teloktep mitkarem nem yariteper, France linük lenisangi sangoktsü.
Tan lendong atalokdaktsürtem indang osang tejangja tang tashi mejangteti lir saka pei temang nung pokshiba oset alenoker kasaji pokdakja asür nisung 7 aser police ketdagnsertemi kaseter 1 densema tan amaker nisung 8 tashi asüba osang jangjaogo.
Tan lendong atalokdaktsür den sentakba osangtem jangjashitsü asoshi France’er anti-terror police ketdangsertemi bushisüngdang tenzükba osanga jangaogo.
Ano külen, United Nations Secretary General, Ban Ki-moon densema alima lenirtemi tan France nung lendong atalokdaktsüba maparen kanga sashia aitsüogo.
“Paris yimti nung lendong atalokdaktsürtem kanga sashia aitsür. Ano, IS teloki tang pua ayuba tai maketba nüburtem tekaraba mapang nung chioktsü ajungshir,” ta Ban-ia metetdaktsü.