France-i Paris lendong ajurushir nem aküm agütsür

Paris yimtiba kübok Les Invalides mitkar museum nung agiba Paris lendong ajurushirtem nem aküm agütsüba sentong nung France Tir, Francois Hollande-i shilem agiba noksa nung angur. (Paris, November 27)

 Paris, November 27 (Agencies): France-i tawa Paris yimti nung Islamist kiralongrartemi tepsetba nisungtem nem aküm agütsüba sentong ka tanü Hokolbar nü agiogo.

Tanü Paris yimtiba kübok Les Invalides mitkar museum nung agiba aküm agütsüba sentong nung hopta 2 tejaklen atalokba lendong nung yirurtemi shilem agia liasü.

Islamic State (IS) kiralongrar teloki chiyongtsü ayokdak, football asayadak aser kenten sentong agidak balala nung tan November ita 13 nü lendong atalokdaktsüba ajanga nisung 350 dak tema yirutsü aser parnok 100 shi tanga mozükidang taneptsü bushia amongba osang jangjaogo.

Tan lendong nung asür France aser bendang linük 17 nungi senso 130 shia indang noksa tanü sentong nung sayuba den külemi, parnok tenüng zünga parnok nem aküm agütsü.

“France-i tan lendong atalokdaktsür densema kiralongrartem ajunga meshimeshi mesamadaktsü tashi parnok den raratsü nangzüker,” ta France Tir, Francois Hollande-i tanü sentong nung sangoktsü.

Kiralongrar nem amokbangdakja malir ta sayua, nüburtemia chiyongtsü ayokdak, sobaliba aser saisapong sentongtem nung maneni shilem agia pelateptsü asoshi pai tanü ayongzük.

“Kiralongrartemi asenok rong nung telemsa adoktsütsü meranger saka parnoki tamakok angutsü,” ta pai shisem.

France police ketdangsertemi tan Paris nung lendong atalokdaktsür timbaka tepset saka parnoki Belgium police den külemi lungjemer tan amala lendong atalokdaktsütsü sentong atonger kiralongrartem maneni arsihiba osanga jangjaogo.

France parliament-ia taruba ita 3 tashi par linük ajunga nung emergency ozüng benoktsü lemteta lir.

Paris nung lendong atalokdaktsüba sülen France-i Syria nung tentetba IS telok anema toaba mapang nungi tang tesashiba raratsü tenzükogo.

Tir Hollande-ia United States, Russia, Britain, Germany aser Italy lenirtem den tan hopta tsüngdong ajurutepa külemi lungjemer Syria aser Iraq na nung tentetba IS telok anema taoba mapang nungi tesashiba raratsü ayongzüka lir.