France-i Syria nung mezüng amakdang IS 30 tepset

Beirut, September 30 (Agencies) : France-i Syria nung Islamic State telungpurtem mezüng amakdang kiralongrar 30 shi tepset aser parnok rongnung tanur sepai 12 dena liasü ta metetdaktsü.

“Deobarnü France-i tayimtsü amshia Syria anüdoklen tsütsü aliba IS training camp ka amakdang IS kiralongrar 30 tepset aser parnok rongnung ‘Cubs of the Caliphate’ 12 densema liasü” ta Syrian Observatory for Human Rights, Rami Abdel Rahman-i ashi.

IS kiralongrartemi tanur sepaitem dang “Cubs of the Caliphate” ta ajar.

Abdel Rahman-isa ashiba agi tasürtem rongnung bendanger IS sepaitem dena liasü aser nisung 20 shi yirua lir.

France Tir Francois Hollande-i ashiba agi, French warplanes troki Deir Ezzor yimti anasa aliba IS training camp ka amak aser tarutsü anogotem nunga amaktsü.

“Onoki IS atema tongtipang tesem ka amak. Iba tesem ya Iraq aser Syria tsüngda senzür kiralongrartem atema tongtipang tesem ka lir” ta French Defence Minister, Jean-Yves Le Drian-ia metetdaktsü.

US-i anir Syria aser Iraq nung IS telok anema raraba nung France-i tan mezüng atema Syria nung tayimtsü amshia amak.

France-i Iraq nungbo IS aliba tesemtem makogo aser tayimtsü amshia 4,500 jungnüa amakba nung parnoki 215 tashi amak.