France-i tan mezüng anüng nungi Syria nung IS amak

Paris, September 27 (Agencies): Mitkar operation tali tuluba akümtsü mapatong nung ajemdaker France linüki tan mezüng Syria nung aliba Islamic State makogo, ta Deobar nü France Tir, Francois Hollande office sangdong ka ajanga metetdaktsü.
Tir office sangdong ajangasa France-i Syria nung IS makogo ta ashiba dak alaka osang tejangjabo ano kecha memetetdaktsü.
Yaküm küm nungi France-i US lenisüba nung Iraq nung aliba IS telok anüng nungi amakba nung shilem agia arudagi, ajisüaka parnok kijaibo Syria nung aliba IS memakdang, kechiba süra parnoki Syria Tir Bashar Assad nem tashi tali magütsünü.
Hollande-i, tan ita tetenzüklen Syria nungi lendong tsüngdang jena oa tangar linük nung jenoker (refugee) tali akümba tebilemtsü asoshi inyakyim tera melenshitsü, ta ashi.
Deobar nü kasa osang ajanga ashiba agi, iba ya linük wazüka ayutsü mapatong dak sentakba inyakyim ka lir, kechiba süra taoba mapang IS teloki France amokmerena lendong tulu agüja liasü.
Tang UN General Assembly telitaki aotsü lia Hollande-i, Syria asoshi yimten tebilemtsü bentettsü kanga nüngdak, ta ashi.
“Syria nung tang rongdakji yimsüsüba tsütsü temelenshi ka nüngdaker aser iba nungji Assad-i aniba telok o opposition naprong dena lir,” ta Hollande-isa ashi.
France-ibo tamasa yongi Assad yimsüsüba aser pa inyakyim kangabo pumesemi liasü.
Tan anüng nungi amakbaji kong aser kodang’ar osang tejangja memetetdaktsü, saka France military-i, “Onoki IS training agiba aser parnok amungba tesemtem nung tenük yoktsü,” ta ashiba France osang ajanga metetdaktsü.
France sorkari, US-i aniba telok nung dena liaka ano onoki koba tesem kodang amaktsüar, onok sasa item telemtetba agitsü, ta ashi.
Tawa arishi küm 3 tanur tebur ka tasümang noksa ngur anogo ishika dang lir külen Syria nunger refugee tem atema tebilemtsü kanga sashia akümba ajanga France-i anüng nungi amakba mapa tenzüktsü akok, ta Hollande-i September 7 nü metetdakja liasü.
Deobar nü sangdong nung Hollande-i, “Nüburtem aliba tesem ajak IS, kiralongrar telok balala aser Tir, Bashar Assad nungeri lendong agütsüba nungi kümzüka ayutsü nüngdaker,” ta metetdaktsü.