France-i train lendong nokdanger 4 nem tematiba sempet agütsür

Paris, August 24 (Agencies): France Tir, Francois Hollande-i taoba Hokolbar nü train nung lendong atalokdaktsütsü meranger ka nokdanga apuba nisung 4 nem France linük indang tematiba sempet, Legion of Honor tanü Hombar nü agütsüogo.

Paris yimti nung tanü tetushi agütsüba sentong tajung ka agia, Hollande-i Britain nunger Chris Norman aser America nunger Spencer Stone, Alek Skarlatos aser Anthony Sadler nunger nem iba nungtugu sempetji agütsü.

“Tongpang nung amshitsü prangpong aser kotari abenba kiralongrasangi lendong tulu atalokdaktsütsü tenzük aser nenoki pei taküm bendanga agüja pa menokdang ka asübo pai tebang agi meshitettsüsa lendong atalokdaktsür lila. Anungji, ozü France densema alima ajungai nenok nem tanü tetushi agütsür,” ta Hollande-i ashi.

Par 4 tenüng tushia sempet agütsüba den külemi, Hollande-i Ayoub El-Khazzani ta ajaba kiralongrasang nokdangbaren nung yarisemertem nema tanü tetushi agüja liasü.

Kiralongrasang nokdangtsü merangdang France nunger ka aser Franco-America nunger ka yirua tang mozükidang taneptsü bushia lir aser tena nema sentong tanga ka ayonga iba Legion of Honor sempet agütsütsü renemogo.

El-Khazzani-i tongpang nung amshitsü Kalashnikov prangpong aser kotari ka bener taoba Hokolbar nütu Amsterdam nungi Paris bushia aoba Thalys high-speed train nung lendong atalokdaktsütsü merang saka tanü sempet agizükertemi pa nokdanga lendong agiena liasü.