France linüki Cuba Tir, Raul Castro pela agizüker

Paris, February 01 (Agencies): France-i par linük semdangsang, Cuba Tir, Raul Castro pela agizükba sentong ka tanü Hombar nü meraketa agiogo.

Taoba Honibar nü Paris yimtiba tonga aosang, Castro ya France Energy Minister, Segolene Royal-i tanü Paris kübok Arch de Triomphe nung pela agizüka liasü.

Tesülen, France Tir, Francois Hollande-ia arishi küm 84 tain Castro den Elysee Palace nung ajurutepba osang jangjaogo.

Küm 50 shi tesendaktep mejungi lir külen United States o Cuba na tsüngda yaküm, 2015 December ita nungi tenzüka tesendaktep tajungba akümtsü tenzükba sülen Cuba semdanger Europe lenirtem rong nung Hollande mezüngbuba aküm.

“Cuba Tir, Castro-i tan France semdangba ajanga ozü linük ana tsüngda tesendaktep tajungba akümba kuli tejangja sayur,” ta Hollande-ia metetdaktsü.

“France aser Cuba nati tang dollar sen million 195 shi jenjang aketba shishilembabaren tenzüka lir,” ta shia, tarutsü mapang nung par linük ana tsüngda shishilembabaren tang aliba den tajungba akümtsü alizüng ayuba olen ka France’er minister of state for foreign trade, Matthia Fekl-ia metetdaktsüogo.