France linüki European Union dang teyari meshir

Belgium kübok Brussels yimti nung amenba European Union (EU) Foreign Ministers senden nung shilem agiba sülen EU’er Foreign Affairs & Security Policy lenila, Federica Mogherini (Achjilen) aser France Defense Minister, Jean-Yves Le Drian nati osangbener den aroki ajuruba noksa nung angur. (Brussels, November 17)

Brussels, November 17 (Agencies): Syria aser Iraq na nung tesep tentetba Islamic State (IS) kiralongrar telok anema raratsü aser linük kümzüka ayutsü maparen nung par linük yaritsü asoshi France linüki takhangba olen ka tanü Mongolbar nü benokogo.

Tawa Paris yimti nung lendong tesashi atalokba sülen France-i iba teyari meshitsü takhangbaji EU tesepti, Brussels yimti nung tanü ayonga amenba EU Defense Ministers senden nung benok.

“EU nung züngsemba linük 27 pronglai ozü linüki aginüba ama, ozü linük yaritsü mulungsoa nangzükogo,” ta France Defense Minister, Jean-Yves Le Drian-i tanü osang jangjashitsü.

“Ozü linüki Iraq aser Syria na nung tentetba IS telok anema raratsüren aser Central African Republic o Lebanon na nung kiralongrartem raratsü maparen den külemi, ozü linük kümzüka ayutsü maparen nung ozü linük nungita yaritsü asoshi EU nung züngsemba linük ajungai tanü par tenangzükba metetdaktsüogo,” ta pai nenshia ashi.

“EU nung züngsemba linük kati lendong tulu ajurura, tanüngba EU linüktemi iba linük nem nungdakba teyari agütsütsü,” ta EU’er Lisbon Treaty tezüngzüktep kübok Arla 42.7 nung latetba ama, France-i tan EU dang teyari meshir lir.

North Atlantic Treaty Organization (NATO) temzüng kübok Arla 5 nung “NATO züngsem ka amakbaji NATO ajunga amaker ta züngshitsü” ta latetba ama, US-ia 2011 küm September ita 11 nü kiralongratsü lendong tesashi ajuruba sülen NATO nungi teyari agiba osang jangjaogo.

“Kiralongrartemi tan France amakba ya EU ajunga amaker lir,” ta EU’er foreign policy lenila, Federica Mogherini-ia tanü metetdaktsüogo.