France nung International Day of Yoga among

Paris, June 19 (Agencies) : Paris nung sobaliba park tulutiba, Parc de La Villette nung Honibarnü tanabuba International Day of Yoga mongogo.
India Ato Kilonser Narendra Modi-i acha ayangba kübok lapokba aser UN-i taküm anema aliyimtsütsü amshitsü agizükba, Yoga Anogo nung Paris yoga meimer tanur aser tain ajak agi parnok nisung 2,000 dak temai iba International Day of Yoga nung silem agiogo, ta Deobarnü sangdong ka ajanga metetdaktsü.
Indo-French sobaliba telok aika, medemer telok, Art of Living, Swami Shivananda Yoga Centre, Tapovan, Yoga & Co, Sahaja Yoga, Isha Foundation aser ano tangartemi iba sentong takok angutsü atema yaritepa liasü.
Indian Ambassador Mohan Kumar-i yoga mezüng tenzükba terasa rateta ashidang pai tanü asüng tensa nunga yoga ya kanga nüngdak ta shisem.
Temang nung tashi aittsü aser shi o shisatsü nung anibelem süngjema kümdaktsütsü atema yoga maneni agitsüla, ta pai lanurtem ajungshi.
Paris nung International Day of Yoga amongtsü atema France aser India nunger film actor aikati sentong ajungketba nung shilem agia liasü.
Paris nung aliba Indian embassy-i ano Deobarnü Eiffel Tower jakdang International Day of Yoga amongtsü sentong ka yangluogo.
June 21, 2016 nü nisung 100 dak temai Seine ayong nung Eiffel Tower nungi Cathedral Notre Dame tashi rong ka nung yoga aitsü sentong lir.
France nung International Day of Yoga ya Paris nung dang masü saka Strasbourg, Nice, Avignon, Angers, Gretz, Samoens, Toulouse, Nantes aser Gouvieux yimtitem nunga mongogo. Iba den külemi ano France nungsa Guadeloupe, Martinique aser Reunion asetkongtem nunga iba anogo mongogo.
France rangben senteper iba sentong nung shilem agir nisung 7,000 shi liasü.