France nung Israel-Palestine yimjung atema senden akatsü

Paris, January 15 (Agencies) : Israel aser Palestine na tsüngda yimjung onük lemteptsü atema Deobarnü linük 70 dak tema nungi tejaokertem international conference nung adentsü asoshi Paris nung adenshia lir.
Palestine nungeribo France-i jazükba senden agizükogo ajisüaka iba senden nung adentsü arua maliba linük, Israel-i, iba senden ya Israel aitsütsü atema adenshir, ta ashiba Deobarnü BBC osang ajanga metetdaktsü.
Iba senden amentsü sangdong ka ajanga Israel aser Palestine na dang tangatettep tajung nung linük anaprongi mulungtepa iba telemtetba agitsüla aser linük ka kijai mulungba agia linük ka aija matatsüla ta ashiba osangbenertemi metetdaktsü.
Iba den külemi Israel pre-1967 temelenshi nung linük anati memulungtepra international teloki magizüktsü, ta sangdong nungjisa shia lir.
Israel-i iba yimjung inyakyim nung international aitba magizük aser parnoki telemtetba kaji chitepa jembiba ajanga tang agitettsü, ta ashi. Ato Kilonser Benjamin Netanyahu-i Paris sendenji taginüba ama masütsü anungji Israel iba nemji malenbangdaktsütsü, ta ashi.
“Palestine nungeri France lenisüba kübok Israel anemtsü lenmang bushir. Iba ama inyakyim ajanga yimjung tesüleni alur,” ta Netanyahu-i ashi.
Office nungi anentsü anogo ishika lia US Secretary of State John Kerry-ia iba senden nung dena tagitsü aser nüngdakba olemtep agia ajaki liromedema inyaka yanglushiba senden südaktsütsü merangtsü.
Otongdar Mark Toner-i, “US-i Israel nem telemtetba kecha menungloktsütsü,” ta ashi.
Netanyahu-i senden anemba aser Trump teloki ola madokba ajanga iba senden ya Israel nunger züngdokba senden ka amai akümtsü, ta France ketdangser kati ashi.
Deobarnü Paris nung Pro-Israel teloki longkak aitsü sentong ka yangluogo.