France nung Middle East Peace Conference amentsü

Paris, December 22 (Agencies): Alima linük 70 shi nungi lenirtemi France yimtiba, Paris nung taruba 2017 küm January ita 15 nü amentsü ayongba Middle East Peace Conference nung shilem agitsü renemba osang ka France Foreign Minister, Jean-Marc Ayrault-i tanü, Brehostibar nü metetdaktsüogo.
Iba senden den sentakba tongti onüktem benoka jembitsü nükjidong nung Israel aser Palestine lenirtema mapang balala nung jaoktsü renemba osang ka pai sangoktsü.
Israel o Palestine na tsüngda mangatettep ken o agiena, teti atema yimji yimjung lidaktsütsü tangatetba nung France-i ayonger külen United Nations (UN), European Union (EU), United States (US) aser tongti Arab linüktem nungi lenirtemi taküm June ita senden ka mena, par linük ana den sentakba tongti onük benoka liasü.
Ajisüaka, iba senden nung shilem agitsü atema Israel aser Palestine lenirtembo mejaok.
Iba senden den sentaktepa, maneni taküm küm tatemlen senden tanga ka amentsü aser iba senden nung Israel Ato Kilonser, Benjamin Netanyahu aser Palestine Tir, Mahmoud Abbas nata jaoka shilem agidaktsütsü renema liasü.
Ajisüaka, Netanyahu-i iba senden nung shilem agitsü asoshi jaokba onük magizükba yong alima tashi abenertemi bilemba ama yimjung sendenji asangsang nung mementeti süidaktsü.
“Israel o Palestine na tsüngda tangatettep kati arua, par linük ana tsüngda teti atema yimji yimjung lidaktsütsü alizüng ozü France-i yua lir. Iba alizüng asangsang nung ajangzüktsü nükjidong nung taruba January ita 15 nü senden jatepogo aser tanü tashi nung alima linük 70 nungi lenirtemi iba senden nung shilem agitsü renema lir,” ta Ayrault-i osang jangjashitsü.
France Tir, Francois Hollande-ia taruba küm amentsü ayongba senden nung agiba telemtetbatem metetdaktsütsü nükjidong nung Netanyahu aser Abbas na par linüki jaoktsü renemba osang angazükogo.