France nung Naga Labour Corps küm 100 ajungba bilemteta amungtsü

Dimapur, April 19 (TYO): Naga Labour Corps-i France nung shilem agiba sülen taküm küm 100 ajunger aser iba tenüng nung April 21, 2017 nü sentong ka agitsü.
Iba mapang Naga nunger 2000 shi shim aser parnok nem Naga Labour Corps ta tenüng jaloktsü.
(Naga) Labour Companies 35th, 36th, 37th aser 38th ta lemsatsüba sülen parnok Mametz, Le Transloy, Haute Avesnes, Contalmaison aser Guillemont tesemtem nung mapa lemzüktsü.
Talisa, April 21, 1917 nü 35th Coy pur Labour Corps nung shilem ka ama Naga Hills toktsü aser April 26 nü France-i aotsü apuso. Rara tembangba sülen April 1918 nung 35th Coy pur Marseille-i ao aser idak nungjagi May ita tatemlen India-i apusoba June 1918 nung tonga aru.
WW I nung shilem agiba ajanga Naga nungertemi telok akümtsü aser longjemtsü angatet aser France nungi meyipa aruba sülen, 1918 nung Naga Club ta ser socio-political association ka tentet aser Kohima o Mokokchung nung kongsangtem lapok.
1929 nung Naga Club-i Simon Commission dang British nungeri India toktsür ora, Naga nungeri pei saka ketdangsüa aotsü temeten agütsütsüla ta shidi ka nung metetdaktsü.
Naga Labour Corps nung dena shilem agirtem aser France nung raradang asür nem tetushi agütsüba nüngshilung ka danga mali aser iba atema Nagaland sorkari küm 100 ajungba nüngtem nung Memorial Park ka yanglutsü telemtetba agi.
Naga Labour Corps indang park ji Red Cross building (near Classic Island) jakdang tenemkong nung yanglutsü.
Iba park indang Memorial Monolith ji April 21, 2017 anüngdang 1:00 ako nung Nagaland Chief Minister, Dr. Shürhozelie Liezietsu-i sayatsütsü.
Iba sentong nung Minister, Parliamentary Secretary, Advisor, Chairman, AHOD/HOD, ketdangsertem aser Kohima nung aliba sensotem arua adentsü pelashishia jaokogo.