France nunger F1 driver Jules Bianchi süogo

Paris, July 18 (Agencies) : Hokolbarnü France nunger Formula One driver Jules Bianchi süogo. Yaküm October ita Japanese Grand Prix mapang gari tsüok dang pa tekolak yiruba ajanga pa asü, ta Bianchi’er kinüngertemi ashi.
Bianchi ya taruba ita küm 26 ajungtsü lia süogo aser pa yaküm lendong ajuruba sülen coma nung dang liasü. France kübok Nice nung pa Centre Hospitalier Universitaire hospital nung amepalua aru.
“Jules-i tatem tashi raraogo, pai teti meranga aru saka tanü pa rara temogo” ta Bianchi’er kinüngertemi Honibarnep Facebook ajanga metetdaktsü.
2013 küm Bianchi-i Marussia team nung züngsem aser iba sülen Grand Prix 34 nnung toktepogo, item ajanga world championship points ana angu.
Japanese Grand Prix mapang Suzuka circuit nung tzünglu aruba agi Bianchi-i anir gari tsüok aser recovery truck ka dak atsük. Iba mapang pai aniba gariji 200 kilometres (125 miles) per hour tekara nung ania liasü.