France o Britain nati sen bn 2 jenjang mitkar tezüngzüktep agir

Paris, March 03 (Agencies): France aser Britain nati dollar sen billion 2.11 shi jenjang aketba nisung memeni anüng nung yimzüdaktsüba drone tayimtsü yanglutsü tezüngzüktep tanü tanü, Brehostibar nü agiogo.

Syria aser Libya na nung tensa kanga mejungi aliba mapang ka nung France aser Britain linük nati par linük kümzüka ayutsü aser mitkar tesendaktep tajungba küma yanglushitsü maparen tenzüka, tan tongti tezüngzüktepji agir lir.

France Tir, Francois Hollande aser Britain Ato Kilonser, David Cameron nati France anüdoklentip tsütsülen, Paris yimtiba nungi anüdoklentip tsütsüleni kilometer 120 shi pilar, Ameins nung tanü ajurutepa iba tezüngzüktepji zülutepa agiba osang jangjaogo.

Britain linüki European Union (EU) nung maneni züngsemba ajanga par linük kümzüka ayutsü jenjang tajungba akümtsü ta bilemba olen ka Cameron-i Hollande den tanü lemsatepa liasü.

Britain linük EU nung maneni züngsemtsü mesüra EU toktsütsü telemtetba agitsü asoshi taküm, 2016 küm June ita 23 nü nüburtem rong nung vote bendentsü ayonga lir aser Cameron-i iba sentong agiba jakdang par Britain EU nung maneni züngsemtsü onük benoka senzüba osang angazükogo.

Par linük ana indang police aser mitkar na tsüngda tesendaktep tajungba kümdakja parnoki aroki lungjemer kiralongrar anema raratsü onüka lenir anati tanü benoka liasü.

United Nations Security Council (UNSC) nung teti asoshi züngsemtsü temeten ngua aliba linük, France aser Britain nati tang Syria aser Iraq na nung tesep tenteta lendong kanga sashia atalokdaktsüba kiralongrar telok tetsüti, Islamic State (IS) anema teraradak lir.

Aji oda, linük anaprongli pound sen million 750 inoka tang yanglua benshiba den kanga agi tajungba drone tayimtsü tasen yanglua kasaji arrür anema itangitsü asoshi aser arrür dak missile kalokja amaktsü maparen nung benshitsü telemtetba ka Hollande aser Cameron nati tanü agiogo.

Future Combat Air System mapatong takok ngua inyaktsü asoshi Britain nung tentetba BAE Systems aser Rolls-Royce telok na aser France nung tentetba Dassault Aviation, Safran aser Thales teloktem anioksemba osanga jangjaogo.

You must be logged in to post a comment Login