France o Germany nati lenisütsü shilem agitsüla: Valls

Berlin, November 17 (Agencies): European Union (EU) telok balala küma loksatsüsa tia ajurua lir ta shia, EU lungjema aser tashi ita alitsü atema France aser Germany nati lenisütsü shilem agitsü tayongzükba olen ka France Ato Kilonser, Manuel Valls-i tanü, Brehostibar nü metetdaktsüogo.
Britain-i Brexit ta ajaba EU toktsütsü telemtetba agiba sülen EU nung züngsemba linüktem rong nung tebendang adokba, kiralongratsüren aser EU-i tang ajurushia aliba migrant nisungtem den sentakba khuret takok ngua bentettsü atema par linük anati tongti shilem agitsü asoshi tang Germany semdanga alisang, Valls-i ajungshia ashi.
“Europe telok balala küma loksatsüsa tang tensa ajurua lir. Anungji, Germany aser France nati Europe-i ajurushiba khuret pongbadaktsütsüsa tongti shilem agitsü nungdaker,” ta Berlin yimtiba nung osangbener den ajurutepdang Valls-i metetdaktsü.
Europe’er mangdang asangsang nung ajangzükdaktsütsü atema par France aser Germany na densema, Europe ajungai aroki lungjemer terenlok lidaktsütsü, nübur nem mapa inyaktsü lenmang lapoktsütsü aser rongsenren jenjang tajungba kümdaktsütsü mapatong takok ngua inyaktsü asoshi pai ayongzüka ashi.
“Britain linüki par Brexit telemtetba agiba sülen par linüki tajangzük balaka ajangzüktsüsa jembitsü sentong renema lir saka tanüngba Europe nem takoksa ngudakja, par linük nem maongka balaka magütsütsüla,” ta pai shisem.
Britain linüki par Brexit telemtetba agiba sülen EU nung jenoka alir migrant nisungtem par linüki aitdakja, idakji jenoka alitsü temeten magütsütsü saka EU’er shishilembadak tetsüdaktsü kecha majurui shishilembatsü alizüng yua lir.
“Migrant nisungtem den sentakba ken o tongtipangsüa züngoka, Britain-i EU toktsütsü lemtet. Ajisüaka, yaküm, 2015 küm kisüng nung migrant nisung million 1 dak tema jenokdak, EU indang arrtsü ajunga taoba mapang nungi tajungba anükba ajanga EU-i migrant nisungtem den sentakba khuret taoba mapang amabo kanga sashia majurutsü,” ta Valls-i ashi.
“Britain-i par Brexit telemtetba agiba aser Republican yimtenren telok nungi Tir candidate, Donald Trump-i tawa US Tir tasenba akümtsü temeten anguba ajanga alimai nübur ola angatsü nungdakba akümba kuli angur. Yimsüsürtemi telemtetba tajung agitsü tsüboba ajanga alima tensa raksatsütsüsa tangatetba alir yimsüsürtem lenir küma shimtsüsa tia bener arutsür,” ta pai shisem.