France o Iran nati shishilembatsü tenzüngzüktep ishika agir

Paris, January 28 (Agencies): Airbus tayimtsü ayoktsü aser France nunger gari yanglur Peugeot teloki Tehran nung tentetba car gari yangludak tajungba küma yanglushitsü tezüngzüktep densema, France aser Iran nati shishilembatsü tenzüngzüktep ishika agiba osang jangjaogo.

France aser Iran na tsüngda shishilembatsü tongti senden ka amenba sülen tan tezüngzüktep agiba osangji Iran Tir, Hassan Rouhani-i metetdaktsü.

Shishilembar aser yimsüsür telok tulu ka anir Rouhani-i Europe semdangtsü mapatong inyaka, yashi Bodbar nü France linük tonga aoba osang jangjaogo.

Alima tashi abenba linüktemi tongpang nung amshitsü nuclear mapatong nung ajemdaker Iran anema benokba tenokdangba sentongtem agienba sülen Rouhani-i tan Europe semdanger lir.

“Ozü linüki nübur aniba Airbus (AIR.PA) tayimtsü 100 dak tema Iran dang ayoktsü tezüngzüktep agiba den külemi, PSA Peugeot Citroen (PEUP.PA) teloki Tehran nung tentetba gari yangludak tajungba küma yanglushitsü nangzüktepogo,” ta France Ato Kilonser, Manuel Valls-ia metetdaktsü.

Paisa ashiba agi, Iran den maneni health, agriculture aser enivornment den sentakba tongti tezüngzüktep ishika agitsü alizüng yua lir.

“Aseni taoba mapang adokba mangatettepbaren amadoker tarutsü mapang tesendaktep junga alitsü alizüng ayutsü ajungshir,” ta Rouhani-ia metetdaktsü.

Par linüki France nungi Airbus tayimtsü alizüktsü tezüngzüktep agiba osangji Iran Transport Minister, Abbas Akhoundi-ia jangjashitsü saka iba tezüngzüktep den sentakba osang tejangjabo pai memetetdaktsü.

Iran-i Airbus tayimtsü 127 shi France linük nungi alizüktsü alizüng ayuba osang ka taoba hopta metetdakja liasü.

Ano külen, Rouhani-i tan France semdangdang France Tir, Francois Hollande den aroki lungjemer par linük ana nung nübur nem agütsüba temeten anema inyakba onüka benoka jembitsü sentong lir.

Lenir anati aibelener nem tasüba temerenshi agütsüba, Iran nung nütsüng yongsük ajema alir kin aser tetsürtem temeten anema inyakba aser kiralongrartemi yaküm November ita Paris nung lendong tesashi atalokdaktsüba sülen France ajunga nung emergency ozüng benokba onüktema benoka jembiteptsü sentong lir.