France Parliament-i Emergency ozüng atsülangshitsü lemtetter

Paris, July 14 (Agencies): France parliament yimsüsürtemi par  linük benokba emergency ozüng ita 2 agi talangba küma atsünglangshitsü onük tanü, Brehostibar nü agizükogo.

Kiralongrartemi yaküm 2015 küm November ita nisung 130 shi tepseta lendong kanga sashia atalokdaktsüba sülen France Tir, Francois Hollande-i emergency ozüngji 2015 küm November ita 14 nü mezüng benok.

Tan atsünglangshitsü agizükba emergency ozüngji Euro 2016 football asayamong aser Tour de France cycle toktepa anishitsü tetoktepba densema, tongti saisapong asayadak 2 tashi nung benoktsü renemer lir.

Parliament lower house, National Assembly nung züngsemba yimsüsür 46-i yimsüsür 20 madak takok ngua, tan emergency ozüngji atsünglangshitsü lemteta liasü.

Kasa ozüngji atsünglangshitsü asoshi upper house, Senate yimsüsürtemibo taküm May ita 10 nü agizükba osang jangjaogo.

Islamic State (IS) aser al Qaeda na densema, kiralongrartemi par France linük lendong balala atalokdaktsütsü sentong renemba osang angazükba olen ka France’er itangitsü tentet nung director, Patrik Calvar-ia metetdaktsüogo.

Kanga tsüboseta bilema aka, Euro 2016 asayamong tan July ia 10 nü timtem kecha mataloki tembangogo saka tan July ita 24 nü tashi agitsü renemba Tour de France tetoktepba sentong nung kiralongrartemi lendong atalokdaktsütsü akok ta France sorkari tebilemtsü khuret benoka lir.

 “Lendong atalokdaktsütsü sentong renemba osang angazükba sülen nübur taküm kümzüktsü asoshi nungdakba terenemshiba agia lir,” ta shia, Tour de France sentong methinentsü lemtetba osang ka France Ato Kilonser, Manuel Valls-ia tanü metetdaktsüogo.

France nung benokba emergency ozüngji taoba mapanga anaben tashi ita 3 atema atsünglangshia liasü saka tan atsünglangshitsü renemba ya tatembangba asütsütsü sentong lir.