France PM, Manuel Valls-i Egypt lenirtem den ajuruteper

France Ato Kilonser, Manuel Valls (Abelen nungi tasembuba) aser Egypt Tir, Abdel Fattach al-Sisi (Tiyongtsü) nati tesülen nungi repranga atadang, France Defense Minister, Jean-Yves Le Drian (Abelen nungi tanabuba) aser Egypt Defense Minister, General Sedki Sobhi (Achijilen nungi tanabuba) nati par linük ana tsüngda mitkar tezüngzüktep kar zülutepa Cairo yimti kübok Presidential Palace kilung nung tanü Honibar nü agiba noksa nung angur. (Cairo, October 10)

Cairo, October 10 (Agencies): Arab linüktem den rongsenren tesendaktep tajungba küma yanglutsü aser Middle East nung tensa mejungi alibaren tajungba kümdaktsütsü nükjidong nung France Ato Kilonser, Manuel Valls-i Arab lima tentetba linük 3 semdangtsü maparen tenzüka, Egypt tonga tanü Honibar aoba osang jangjaogo.
Valls-i tanü Cairo yimti tonga aoba sülen Egypt Tir, Abdel Fattah al-Sisi-i Valls pela agizüka liasü.
Tesülen, Valls-i Sisi den senden ka amenba den külemi, Egypt Ato Kilonser, Sharif Ismail dena senden ka amenba osang jangjaogo.
France linüki Russia dang ayoktsü asoshi yangluba Mistral tongpang nung amshitsü rong 2 tashi alizüktsü asoshi Egypt-i France den tezüngzüktep agiba osang ka France Tir, Francois Hollande-i taoba September ita sangoktsüba ama, Valls sülen anidaksang, France Defence Minister, Jean-Yves Le Drian aser Egypt Defense Minister, General Sedki Sobhi nati tanü sen agütsüteptsü tezüngzüktep zülutepa agiba osanga jangjaogo.
Aji oda, Saudi Arabia nungi senotsü teyari agia, Egypt-i tongpang nung amshitsü rongji dollar sen billion 1 yong alizüktsü aser taruba 2016 küm February ita nunga France nungi Rafale jet fighter tayimtsü alizüktsü asoshi dollar sen billon 5.9 agütsütsü nangzükteper lir.
Valls-i tan Egypt, Jordan aser Saudi Arabia semdangdang, Russia-i Syria tongpang nung tongti shilem agitsü tenzükba aser Israel o Palestine na tsüngda tesendaktep mejungi akümba den sentakba onüka tongtipangsüa linük asem indang lenirtem den benoka jembitsü sentong renema lir.