France Police-i kiralongrar mita ao: Kiralongar 2 asü, 7 apu

France police ketdangsertemi Paris yimti anüdoklentiptsütsü, St. Denis kiyong nung kiralongrar aputsü asoshi terenemshiba agiba noksa nung angur. Parnoki tanü kiralongartem mitba sülen kiralongrar ta temulung melemi bilemba nisung 7 tashi apuba osang jangjaogo. (Paris, November 18)

 Paris, November 18 (Agencies): France police ketdangsertemi tawa Paris yimti nung lendong atalokdaktsür kiralongrartem aputsü nükjidong nung tanü mitba sentong ka agiba sülen temulung melemi bilemba nisung 7 tashi apuba osang jangjaogo.

“Paris kübok St. Denis kiyong nung tentetba ki ka mittsü tenzükdang peisasa pokseta asütsütsü mulungteter tetsür kiralongrar kati pokshiba oset pokdakja la aser la den külemi kilung nung alir kiralongrar ka pokseta südaktsüba osanga jangjaogo,” ta French Interior Minister, Bernard Cazenueve-i osang jangjashitsü.

Paris nung tan November ita 13 nü lendong atalokdaktsütsü sentong atongsang, Abdelhamid Abaaoud aputsü nükjidong nung police-i tanü mittsü sentongji agi saka ghonda 7 shi iba sentongji agiba sülena parnoki Abaaoud den sentakba osang mejangjateti lir.

“Tanü apurtemji shirnok lir iba osang tejangja tang tashi mebushiteti lir. Ajisüaka, parnokji jangjatsü asoshi nungdakba bushisüngdang tenzüka lir,” ta Paris prosecutor, Francois Molins-ia tanü miitsü sentong tembangba sülen metetdaktsü.

Belgium senso, Abaaoud St. Denis nung atsüka alitsü akok ta osang angazükba sülen police ketdangsertemi tanü mittsü sentongji agi ta pai ashi.

Paisa ashiba agi, tetsür kiralongralai pokshiba oset pokdaktsüba ajanga police ketdangser 3 aser anasa alir nisung 1 densema nisung 4 tashi yiruba aser police-i aniba azü ka poksetba osang jangjaogo.

Syria nung tentetba IS teloki Belgium nung jenoka alir IS züngsemtem den külemi lungjemer tawa nisung 129 tashi tepseta Paris ung lendong atalokdaktsü ta bushisüngdangertemi tanü tashi nung osang bushiteta lir.