France: School bus aser truck ka tsüktep; tanur 6 tsükset

France anülulentip tsütsülen Rochefort jila nung school bus ka aser khu abenba truck gari ka na tsüktepa lendong atalokba sülen France police aser rescue ketdangsertemi lendong atalokdak mapa inyakba noksa nung angur. (Rochefort, February 11)

 Paris, February 11 (Agencies): France anülulentip tsütsülen Charente-Maritime region kübok densemba jila ka nung tila tanur aniba school bus gari ka aser longsang abenba truck gari ka tanü, Brehostibar nü tsüktepa lendong atalokba osang ka France police ketdangsertemi metetdaktsüogo.

“Gari tsüktepba lendongji Rochefort jila nung tanep 7:15 ako meta atalok aser tang tashi nung tila tanur 6 tashi tsüksetba osang jangjaogo,” ta parnoki ashi.

School bus gari tanga kati lendong ajurua tila tanur 2 tashi tasüba lendong ajurur anogo tanabuba nung tan iba lendongji ataloker lir.

Parnokisa ashiba agi, tanü lendong ajuruba bus gari nisung 17 tashi anir liasü aser tanü lendong nung tila tanur 3 tashi yirua liasü.

Tanü lendong atalokba atema sasa bilemba olen ka metetdaktsüba den külemi, tan lendongji kechi timtem ajanga atalok iba osang jangjashitsü tenangzükba olen ka France Tir, Francois Hollande-ia metetdaktsüogo.

Yashi, Bodbar nüa France anüdoklen, Switzerland arrtsülen arishi küm 12-15 tsüngda tain tanurtem aniba school bus gari ka rüjeb nung ajudoka lenmang tezülen tsükokba ajanga tanur 2 asüba osang jangjaogo.

Montbenoit yimtsüng bushia aodang tanur 32 aniba bus gari yashi lendongji ajurua liasü.