France tsür kati tanur tepseter soseta asü

Panaji, July 16 (Agencies) : Anjuna yimtsüng nung France tsür kati lai mesüba jala, arishi küm 7 tain ka tepsetba sülen la-a soseta asü, ta tanü Honibarnü police-i ashi.
“France tsür Severina Figueiredo-i küm asem tejakdang Karnataka nungi anir arua mesüba jala tepsetba sülen blade ka agi la sasa la tekong rangdanga asü,” ta Anjuna Police Inspector Paresh Naik-i PTI dang ashi.
Iba tatalokba ya yashi Hokolbarnü Severina’er medemer ka lar kidangi kazüi aodang ang metet, ta Naik-i ashi.
Police-i, iba lendong atalokba mapang Severina kinungbo-bo France-i orr liasü, ta ashi.
Severina-i France oshi nung tatembang shidi ka zülua yutsüba la mang anasa liasü. Ni tebilemtsü aika arua kechiang mesangyangba agi iba mapa inyaktsüsa aküm, ta shidi nungji zülua lir, ta Naik-isa ashi.
Severina aser kinungbo na ya tourist visa kübok Goa nung alirba lir.
Tena tasümangji sensa-a reprangtsü atema yokogo aser Indian Penal Code (IPC) kübok Anjuna police station nung case ka benoka lir, ta Naik-i metetdaktsü.