Francis-i Kirill den ajurutepba sülen Mexico tonga ogo

Mexico yimtiba, Mexico City kübok Benito Juarez International Airport tonga aoba sülen Mexico sobaliba sübotsü asemba tanurtemi Pope Francis den ajurutepba noksa nung angur. Mexico Tir, Enrique Pena Nieto aser pa kinüngtsü, Angelica Rivera nata Francis achiji aser abelen nokdaka aliba noksa nung angur. (Mexico City, February 13)

Mexico City, February 13 (Agencies): Alima ajunga nung Roman Catholic tamangba yimsü benshir lenisang, Pope Francis-i Cuba kübok Havana nung tentetba tayimtsü anendak Russian Orthodox Khristanpur lenisang, Patriarch Kirill den ajurutepba sülen Mexico yasüng, Hokolbar aonung tonga aoba osang jangjaogo.
Francis-i tan mezüngsüa Catholic tamangba yimsü benshir nisung jenti alidak, Mexico linük semdanger lir.
Francis-i yasüng Mexico City tonga aoba sülen Mexico Tir, Enrique Pena Nieto aser pa kinüngtsü, Angelica Rivera na den külemi, Mexico nübur meyirijang aikati pa pela agizüka liasü.
Mexico bushia aoba jakdang Francis-i Kirill den ajurua tongti senden ka amen aser tenati tamangba yimsü benshitsüren nung lungjema alitsü tezüngzüktep ka zülutepa agi.
West aser East na nung tentetba Khristan tamangba yimsü 2 küma, küm 1000 shi sadanga alibaren benteta tanaben sentaktepshidaktsütsü nükjidong nung Francis aser Kirill nati tan ajurutepa tanaben lungjemshitsü nangzükteper lir.
Francis aser Kirill nati Havana kübok tentetba Jose Marti International Airport nung yashi ghonda 2 shi agia senden amenba osang jangjaogo.
Kirill-ia Francis den ajurutepa senden amenba sülen pai maneni Cuba linük semdanga par lenirtem den ajurutepba osanga jangjaogo.
1054 AD nung Great Schism mangatettep ken o adokba sülen East aser West na nung tentetba Khristan tamangba yimsü 2 küma sadanga liasü.
Tan Francis aser Kirill nati tsüngdong ajurutepbaji 1054 AD sülen Pope aser Orthodox Patriarch nati otsüsütsüsa tan mezüng ajuruteper lir.
Pope ya alima ajunga nung Catholic tamangba yimsü benshir nisung billion 1 shi lenisang lir aser Patriarch ya alima ajunga nung Orthodox Khristanpur nisung million 250 shi rong nung Russia nung alir nisung million 165 lenisang lir.