Frank de Boer Crystal Palace Manager inyaktsü shimogo

June 26, 2017 (Agencies): Crystal Palace-i taoba Ajax Amsterdam aser Inter Milan coach Frank de Boer küm asem atema parnok manager inyaktsü asoshi shimtetogo, ta parnoki Hombarnü metetdaktsü.
Arishi küm 47 tain Dutch nunger coach ya yaküm November ita Serie A club Inter Milan-i mapa nungi anentsüba sülen kecha club nunga shilem magii dang liasü.
“Frank amala experience aliba manager ka shimtsü asoshi onok atema apet asü mapet jangjatsü asoshi interview aika agiogo. Ni pa Crystal Palace-i pelala jaoker aser pa iba club nung dena club 1 division nung küm 5buba atema renemshitsü asoshi matateter ta meteta lir,” ta Palace mendenbuba Steve Parish-i ashi.
Taoba season tembangba sülen manager Sam Allardyce-i club toktsü aser iba ajanga Palace pur manager meli-i liasü.
De Boer taoba mapang nung Ajax aser Barcelona nungi asayaa liasü. Pa Dutch national team nungi 112 ben asaya aser pa ya Palace nung British nunger masür manager tanabuba lir.
“Iba shilem ya kü asoshi kanga jangratemtsü maongka ka lir aser Premier League nung asayartem aser staff tem den inyaktsü asoshi matateter,” ta De Boer-i shi.
Palace pur taoba season nung jenjang 14 buba nung point 41 ngur tembang. Parnoki asaya 38 nung 12 ben koka liasü.