Frank Sinatra Jr. arishi küm 72 nung süogo

March 17, 2016 : Asür nüngtugu entertainer Frank Sinatra’er jabaso Frank Sinatra Jr. Bodhbarnü süogo, ta pa manager Andrea Kauffman-i ashi. Pa arishi küm 72 liasü.

Kauffman-i ashiba agi, Sinatra ya Daytona Beach, Florida, mozükidang asü.

Kentener Nancy Sinatra-i, küdi ya temulungjang mapa meinyaki anenba ajanga asü, ta la meyong Facebook tapak ajanga metetdaktsü.

“Frankie, na anisüngzüka mejangang……” ta lai zülua liasü.

Sinatra ya “Sinatra Sings Sinatra” tour tejajadak liasü aser Bodhbarnü Peabody Auditorium nung kenten sentong agitsü liasü.

1963 küm Sinatra arishi küm 19 lanur ka asüba mapang tebo kentenba sülen anidaka jajadang nisung kari sen meshitsü mechi pa pua bener ao. Anogo asem lir külen pa apuer nisung ana nem tebui sen dollar 240,000 agütsüba sülen ang pa chiok. Anogo ishika süier külen pa apuer rongnung kati pa apubaji par adianu dang ashi aser iba sang jagi FBI dang shir Sinatra pua bener aoer ajak gondha ishika tsüngda nung apu, ta FBI-i ashi.

Sinatra-i akümlidang ashiba agi, ni kübuji chitepa anguba dang nungibo screen nung timba ngudang.

“Pa tebu tajung ka liasü,” ta pai ashi.

Ajisüaka tebu tatembang tour jajaba mapang Sinatra Jr. tebu telok nung lenir sür jajadang tena tesentaktep kanga anasatepa aküm.

Sinatra ola aser tereprangtsü ajak agi tebu mesük lir aser pai kensep trok shi adoka lir.

Pai, “Ni tapu ajak nung kübubosa memenep,” ta tawa ang Daytona Beach News-Journal dang shia liasü.

Sinatra Jr.-i teno Nancy aser Tina Sinatra na den jabaso Michael Sinatra nunger toktsür iba nungi pila.