‘Freedom 251’ ken o nung ketdangsür pezü bushir

February 26, 2017 : Noida nung aliba Ringing Bells Pvt Ltd ajanga alima nung sen jenjang talangtiba indang phone sayaba sülen iba indang director, Mohit Goel apu, aser police temi maneni director pezü aputsü bushirdar.
Ringing Bells-i Ghaziabad nung aliba Ayam Enterprises sen lakh 16 tashi nung külakoktsü, ta FIR ka benokba sülen police temi Goel ya Brehostibarnü apu.
“FIR nung agüja aliba director pezü- Anmol Goel, Dharna Garg (Mohil Goel kinungtsü), Ashok Chandha aser Sumit Kumar nungertem aputsü bushirdar,” ta Superintendent of Police, Salman Taj Patil-i osangbener dang ashi.
Goel apuba sülen iba company nung inyaker nisung aika police station-i arua parnok iba company kübok tim atemba o tem ashi, ta ketdangsertemi metetdaktsü.
‘Freedom 251’ smartphone ya tesem balalai belenshitsü asoshi Goel aser company ketdangsertemi Ayam Enterprises 2015 küm November ita nung mesüzük, ta FIR nung shia lir.
‘Freedom 251’ ya India nung sen 250 agi ayoktsü liasü.
“RTGS ajanga onoki mapang balala nung Ringing Bells nem sen lakh 30 agütsü. Saka parnoki sen lakh 13 jenjang oset dang agütsü. Iba sülen aruba sen aser oset aruba ajak agi sen lakh 14 jenjang dang liasü,” ta Ayam Enterprises-i ashi.
“Goel-i küm ana tejaklen par company-i yangluba oset belenshitsü asoshi ‘clearing & forwarding’ (C&F) agent asütsü asoshi kü dang ashi,” ta Ayam Enterprises nung inyaker, Akshay Malhotra-i osangbener dang ashi.
“Aiben jembia aruba sülen Goel-i sen lakh 8 jenjang ‘Freedom 251’ mobile phone ya bener yok. Saka item phone tem ya kanga majung asüba ajanga parnoki Ringing Bells dangi meyiba yok,” ta Malhotra-isa ashi.
“Iba sülen Goel-i phone melena power bank aser LED bulb ang agütsü,” ta paisa ashi.
Indian Panel Code 420, 406, 467, 468, 471 aser 120 (b) kübok iba FIR ya züluokba sülen Goel ya police temi Indirapuram, ATS Towers nung aliba par kidang apu.
‘Freedom 251’ ya 5,000 bo costumer ket tongtsüogo aser ‘cash on delivery’ (COD) nung jilia makaa atar 65,000 nem agütsütsü lir, ta taoba küm July ita nung Ringing Bills ajanga sangdonga liasü.
2016 küm July 30 tashi nung iba smartphone ya million 2.5 yanglua costumer nem agütsütsü asoshi Ringing Bells ajanga taoba küm February tom ka nung sangdong, aser iba osang prokshiba sülen iba smartphone agitsü asoshi nisung million 70-i tenüng züluok.
Smartphone kaji jenjang tajemtiba agi sen 2,000 tashi agi yanglutettsü, ta mongin temi ashiba sülen iba phone ya komala ka asütsü, ta nüburtemi kanga yongya liasü.