Freedom 251 mangaba website nung timtem

New Delhi,Feb 19 (Agencies): Alima nung senkhu dalangtiba “Make in India” smartphone, “Freedom 251” online ajanga jilia mangatsü sangdonger mezüng anogo nung website ‘crash’ asüba sülen tananü nungibo mangatettsüsa yanglutsü ta nangzük ajisüaka sen 251 alang phone mangadang website ajanga ano maneni timtem agütsür.
Iba phone ya design aser tereprangtsü ajak Apple iPhone den saku ta olulu aika adoka lir aser tang linük sorkari Brihostibarnep 6:00 nungi pezünü phone jilia mangaba sentong lapoktsüba mapang nungi kanga tenoka tenük yokdar. Noida nung amenoka aliba Ringing Bells Pvt Ltd dangi mezüng nü (Feb. 18, 2016) order 30,000 aruogo aser ashiba agi iba nü second ka tsüngda nung nisung lakh troki khen nung iba website lapoka amshia liasü.
Ajisüaka gondha ishika dang lirbo www.freedom251.com website raksaba ajanga parnoki jilia mangaba ka danga magizük.
Yamaji süaka ano tia takar karibo anepdang tsütsü website junga aliba mapang takok ngua iba smartphone mangateta liasü.
“Ni gondha ka jungnüa iba phone jilia mangatsü asoshi merangdangogo. Nüngdakba ajak aiben ajenokdangogo. Yamaji aiben merangdangba sülen ni takok ngua mangatetogo saka ano senbo ano magutsü,” ta Noida nung nija compangy ka nung inyaker Kashi Nath Nandi-i ashi.
Ni phone mangazüker külen, “Nai phone mangaba atema pelar. Nai iba phone asoshi sen yoktsü atema onoki gondha 48 tsüngda nung email link ka nai agütsüba email ajanga yoktsü aser nai sen agütsüba sülen iba phone aliba mapa tembangtsü,” ta page ka nung osang ka adok.
Aser iba osang adokba page nung order number den phone ka mangaba osang tejangja agütsü.
Ringing Bells-i iba phone ki tongtsütsü atema sen 40 talila agitsü anungji phone atema sen ajak agi 291 asütsü. Parnoki iba phone ya mangar ita pezü lir, June 30 tashi nung temangar ket tongtsütsü nangzükogo.
Indian Cellular Association-i, “Smartphone ka sen yamai dalang agi ayokba ya tamakoktsü mapa lir, anungji sorkari telung tonga ia reprangdangtsüla,” ta telecom ministry nem tezüluba ka agütsüogo.
Osang kakettem nung iba phone indang noksa adoktsübaji reprangdangra built-in app ajakji Apple indang iOS icons tem den saku lir.
Apple website nung, “Apple dang nungi temelaba magi-i Apple indang logo, graphic symbol, mesüra icon achizüka amashitsü memelar,” ta shia lir.
“Freedom 251” nung Android 5.1 operating system, 4-inch qHD IPS display, tesülen 3.2-megapixel aser tejaklen 0.3-megapixel camera keta lir, ta parnoki ashir.
Parnokisa ashiba agi iba phone nung 3G amshitettsü, tema nungi 32GB memory tashi amshitettsü, 1.3GHz quad-core processor, 1GB RAM aser telung nung 8GB memory enokja lir.
“Freedom 251” nung 1,450mAh battery ajanga tashi rangben agütsütsü aser linük tesem 650 nung service centre lir ta company ajanga ashir.