‘Freedom 251’ phone shia nungi sen 31 ajangzüktsü:Mohit Goel

New Delhi, February 22 (Agencies): Pai sen 251 indang smartphone sayaba osang metetdaktsüba sülen tamang makai Mohit Goel dangi police aser income tax ketdangsertem Noida nung pa aliba para kidangi arua ajurutepa liasü.
Ajisüaka Amity University nungi graduate asüsang, Goel-i phone manga alirtem nem phone ki tongtsüba dang masü saka iba smartphone ka nungi sen 31 tajangzük alur, ta jangja jangja ashi.
Times of India (TOI) osangbenertem den interview agiba mapang Goel-i, “Kechiba ni yamai animesüngzükdaktsür ? Ni kechi tai inyak ?” ta asüngdang.
Ringing Bells director, Goel-i, “Iba mapa ya manger mesangwa nung inyakla mapa masü. April 15, 2016 nü nungi tenzüka phone jilia mangar alirtem nem iba phone ki tongtsüba mapa tenzüktsü,” ta ashi.
“Ni aser ozü company-i income-tax khen danga magütsüi ali asü mesüra ni aliba police station nung ni anema FIR khen danga benoka lir ? Kechiba kü dang ‘bhagora’ ta ajar, shiba sen bener ajentsü ? Ni ochi business inyaktsü meranger aser iba business asoshi sentong shitak yanglua lir,” ta pai ashi.
Par company-i ashiba agi, phone jilia mangatsü atema February 18 nü website lapoktsüba sülen tang tashi nung order crore 7 arua lir.
Onoki oset akaba yari mezüng batch nung online ajanga mangaba lakh 25 ang agizüker aser lakh 25 offline ajanga ayoktsü. Ni item order ji June 30 tashi nung tongtsütsü. Phone atema sen agütsüba ajak onoki ICICI den lapokba account nung yua atatsü aser oset agi ki metongtsü tashi medangshitsü, ta pai ashi.