Freedom 251 smartphone lakh 2 yanglua lir;HD LED TV yanglutsü:Ringing Bells

New Delhi, June 23 (Agencies) : Sector 62 office nung anisüngzüka mener ozü company-i nüburtem dang nangzükba inyaktetogo, ta Ringing Bells’ company ngutetsang aser CEO Mohit Goel-i ashi.

Alima nung smartphone tem rongnung sen dalangtiba Freedom 251, sen 251 alang smartphone tem yangluzükogo. Noida nung aliba Ringing Bells Pvt Ltd-i ashiba agi, iba phone yanglutsü tamakoktsü asütsü ta aikati aijaka onoki nangzükba inyaktetogo. Iba phone yanglutsü sangdongba sülen company anema FIR-a ka benokogo.

“Onoki Freedom 251 smartphone lakh 2 shi renema yangluogo. June 30, 2016 nü nungi tenzüka phone manga alirtem nem onoki item phone tongtsü tenzüktsü,” ta Goel-i IANS dang ashidang paisa, phone lakh ana ya tongtsüsepba sülen ano kasa phone mangatsü atema mapang lapoktsütsü, ta shisem.

June 30, 2016 tashi nung iba phone lakh 25 tashi talirtem ket tongtsütsü ta parnoki taküm February tom ka nung sentong yanglu. Ajisüaka anogo asem tsüngda nung order crore tenet arua parnok indang website raksa.

“Tang nungibo oset meyangluzük tashi onoki ajemajema atatsü. Tang onok ket nung inch 4 aser SIM ana amshitetba phone yangluzüker manga-a alirtem ket tongtsütsü renema lir. Tangang kü mulung ali-i aluogo,” ta pai tangoa mesashi-i ashi.

Goel-isa ashiba agi, phone shia sen 140 nungi 150 tashi takoksa alur, ajisüaka aika yanglu nungbo tajangzük terabo alutsü imlar.

“Onok takoksa alur, ajisüaka ‘Freedom 251’ smartphone ajanga ‘Digital India’ aser ‘Make in India’ inyakyim kübok onoki India nunger yimtak lir aser yimti nung alirtem sentaktepa kümdaktsütetba mapa inyaktetba atema kanga pelar,” ta Goel-i ashi.

Iba 3G device nung 1.3GHz quad-core processor, 1GB RAM aser phone telung nung memory 8GB keta lir. Phone tema nungi memory 32GB tashi amshitettsü. IANS nem parnoki phone ka danga magütsü, ajisüaka noksa ang ka agidaktsü.

Iba phone tejaklen 3.2MP camera aser tesülen 8MP camera den flash dena inokja lir. Phone ya Android 5.1 (Lollipop) ajanga amshir aser 1,800 mAh battery agi tashi agütsür.

Freedom 251 ya sentsü ana nung angutsü-tanak aser temesüng.

Phone mezüng lapokdang India wako adoker aser company-i tamshirtem nüngdakba Google app ajak inokja lir.

“Item phone tem ya onok meyong phone yangluba tesem Haridwar nung yanglu. Ita shia iba phone lakh anana ayoktsü onok tebilemba lir,” ta pai ashi.

Iba den külemi ozü company-i high-definition LED television-a ka July mezüng hopta nung sayatsü tebilemba lir.

“Iba TV ya linük nung anguba TV rongnung sen dalangtiba asütsü koba sen 10,000 dang tajemba agi ayoktsü. TV ya online ajanga ayoktsü aser temangar shia ket anogo ananü tsüngda nung tongtsütsü,” ta ashidang Goel-i, onok ket nung iba TV ya lakh kashibo rizünga lir, ta shisem.

Ringing Bells-i February ita nung ‘Freedom 251’ phone sayadang BJP lenir tejen Murli Manohar Joshi-ia dena liasü.