French Consulate General M. Sayed-i Angh Acharya den ajurutep

Dimapur, October 14 (TYO) : October 13, 2015 nü Raj Bhavan, Guwahati nung Consulate General of France Kolkata, Monsieur Damien Syed-i Assam aser Nagaland Angh, P. B. Acharya den ajuruogo.
Pai tang mezüngbuba atema Assam semdangi aru aser state tobur ajungba ngua pa kanga süngmanger ta Consulate General-i Angh dang ashi, ta Raj Bhavan sangdong ka nung metetdaktsü.
Damien Syed ji Azara nung sports store lapoktsütsü atema aruba liasü aser pai Acharya den sensaksemdang France sorkari Assam nung mapatong balala inyakba osang metetdaktsü, ta sangdong nungsa shia lir.
Acharya-i M. Sayed dang Northeast indang temetettsü lemsatepdang iba tesem nung oshi 200 jungnüa lir aser sobaliba – tsüngsang aser kentenmenü talubosa lir ta ashi.
Northeast tesem mashi ka nung France sorkar pelashishia agizüktsü, ta Angh Acharya-isa metetdaktsü.
Northeast tesem nung mineral oil amala ali rongsen aika lir aser solar energy peria lir. Iba tesem ya organic agricultural products aser handloom o handicraft products nung kanga takar lir, ta Angh-isa M. Sayed dang ashi.
Iba mapang nungsa Consul General-i Acharya dang France sorkar aser Assam sorkar tsüngda bio-diversity aser forest conservation atema mapatong tuluka inyaktsü tenzükba osang metetdaktsü, ta Raj Bhavan sangdong nungsa shia lir.