French Open 2017: Murray aser Halep quarter tongogo

Paris, June 05 (Agencies): Britain nunger tebur tennis asayar, Andy Murray-i Karen Khachanov madak takok ngua French Open 2017 indang quarter-final tongtetogo.
World No. 1, Murray aser Russia nunger Karen Khachanov tsüngda ghonda ana-sür minute pezü asayaba nung Murray-i 6-3, 6-4, 6-4 agi akok.
Arishi küm 30 tain, Murray ya quarter nung World No. 8, Kei Nishikori den asayatsü.
Iba asaya akokba sülen Murray-i tawa kiralongrar temi Manchester aser London nung lendong agütsüdang takoksa ajurur alir nem tetushi agütsü.
“Hopta ishika tsüngda London aser Manchester nung lendong tesashi ajuruogo. Paris nunga taoba küm ishika tsüngda nung yamaji lendong ajangshiogo aser ni amanger, iba lendong agi kongshir alir atema bilemba aser sarasademtsüba nung nisung ajaki adentsü,” ta pai ashi.
“Iba lendong ajanga Europe aser alima ajunga nung aliba tesem aika nung kongshiogo. Aji süaka nenok ajaki arua onok pusemba asoshi pelar aser nenok jakdang asayatsü kü nem maongka agütsüba asoshi kanga pelar,” ta pai-sa shisem.
British nunger tennis tebur kija asayari French Open akokba ya 1935 küm Fred Perry-i dang koka lir.
2017 French Open tetsür kija tennis asaya nung Simona Halep quarter final tongtetogo. Lai Carla Suarez-Navarro madak 6-1, 6-1 agi takok angu.
Iba tournament nung tetsür kija tennis asayartemi taoba mapang French Open koka alir kata quarter final nung mali. Taoba mapang iba tournament akoker, Serena Williams mashisa aliba agi taküm masayateter aser Maria Sharapova iba asayamong nung shilem agitsü maongka magütsü.
Simona Halep ya quarter final nung Ukraine tsür, Elina Svitolina den asayatsü.
Elina Svitolina ya Croatia tsür, Petra Martic madak 4-6, 6-3, 7-5 agi takok ngua French Open 2017 quarter-final tongtet.