French Open 2017: Nadal, Garbine nunger takok nung lir

Paris, June 02 (Agencies): French Open 2017 tennis tebur kija asaya nung last 16 atongtsü asoshi taoba mapang iba asayamong takok tokuben tashi bena alisang, Rafael Nadal-i game ka nung dang tamakok alua Georgia nunger Nikoloz Basilashvili madak 6-0, 6-1, 6-0 agi takok angu.
“Tanü ni kanga junga asayaogo. Asüng 8:45 nung ni TV jakdang ozü telok asayaba reprangtsü, aser Real Madrid-i akoktsü imlar,” ta Nadal-i iba asaya temer ashi.
Deobarnü Nadal küm 31 ajungtsü lir aser pa asoba anogomong nung Nadal ya Champions League final, Real Madrid aser Juventus tsüngta asayaba reprangtsü sentong lir.
Quarter-final atema Nadal ya par kasa lisopur, Roberto Bautista Agut den asayatsü.
Canada nunger Milos Raonic-a last 16 nung-i iogo. 2014 küm French Open nung quarter-final nung tsüksang, Raonic aser Spain nunger Guillermo Garcia-Lopez asayaba nung Raonic-i mezüng set 6-1 agi akok aser tanabuba set 1-0 lia Guillermo tetsüng yiruba ajanga asaya tenzüker minute 28buba nung iba asaya anentsüsa aküm.
Milos Raonic ya taruba asaya nung Spain nunger Pablo Carreno Busta den asayatsü. Pablo-i Bulgaria nunger Grigo Dimitrov madak 7-5, 6-3, 6-4 agi akok.
Belgium nunger David Goffin-a Argentina nunger Horacio Zeballos den tasembuba round asayaba mapang temokok yiruba ajanga asaya tembanga masayateti anentsüsa aküm.
Suzanne Lenglen court nung asayadang Goffin-i Horacio madak 5-4 agi timba points ngur liasü.
Tetsürtem kija asaya round pezübuba nung Muguruza-i Kazakhstan tsür Yulia Putintseva madak 7-5, 6-2 agi takok angu.
Muguruza ya last eight atema France tsür Kristina Mladenovic mesüra America tsür Shelby Rogers den asayatsü.
Maneni kasa asayamong tebur kija asaya nung World No. 1, Andy Murray aser 2009 US Open Champion, Juan Martin del Potro tsüngta Honibarnü asayatsü lir.
Murray aser Argentina nunger Potro tsüngta tamalen asaya aruba nung Murray-i trokben aser Potro-i asemben koka lir.
Rio Olympics nung tena final asayaba nung Andy Murray-i Del Potro madak takok ngua liasü. Iba sülen taoba küm Davis Cup semi-final nung tena asaya aser Potro-i Rio mang yanga liasü.
“Iba asaya ya kanga tasak asütsü. Tasembuba round temela masütsü. Pa temang anema lira alima nung asayar tajungtiba rongnung ka lir,” ta Murray-i Del Potro indang ashi.
Murray ya Australian Open round pezübuba nung tsük aser pa form dangi maruteti Monte Carlo, Madrid aser Rome nunga junga masayateti lir.