French Open: Cilic, Thiem & Muguruza tasembuba round-i iogo

Paris, Monupii (May) 31 (Agencies): French open tebur kija asaya nung Marin Cilic aser Dominic Thiem na kanga meranga asayar asayamung tasembuba round tongtetogo.
Seed asembuba nung alisang Cilic-i 6-2, 6-2, 6-7 3/7), 7-5 agi Polish qualifier aser world number 188 Hubert Hurkacz koka iba asayamung tasembuba round-i tibenbuba atonga iogo.
Taoba US Open champion Cilic shibai taoba küm Paris nung quarter-finals tonga asayaogo, pa quarter final nung jenjang ka atema United States nunger Steve Johnson den taruba round asayatsü.
“Ni asaya amokbanger asayaa liasü, saka set tasembuba nung junga masayaba ajanga tanaben tenzükshitsüsa aküm,” ta arishi küm 29 tain asayari ashi.
Seed tenetbuba nung alisang Thiem shibai 2016 aser 2017 nung iba asayamung semi-final tonga asayaogo, pai tan asaya dena taküm asaya 31buba koktetogo.
Taküm clay court nung Thiem-i dang Rafael Nadal koka lir aser pai tan asaya nung Greek nunger asayar Stefanos Tsitsipas 6-2, 2-6, 6-4, 6-4 agi kokogo.
Pa taruba asaya Italy nunger asayar Matteo Berrettini den asayatsü.
Kasa mapang nung Canadia nunger asayar Denis Shapovalov, 5-7, 7-6 (7/4), 7-5, 6-4 agi Germany nunger asayar Maximilian Marterer-i kokogo.
Arishi küm 22 tain Marterer-i Grand Slam asayamung ana nung atonga tasembuba round tongtetogo aser pa Ruben Bemmelmans mesera Jurgen Zopp den asayatsü.
Kasa asayamung tetsür kija asaya nung Garbine Muguruza-i 6-4 6-3 agi France tsür Fiona Ferro koka French Open tasembuba round nung jenjang ka ngutetogo.
Muguruza-i 2016 küm Roland Garros kokogo aser taküm Wimbledon nung defending champion ama asayatsü lir. Lai taoba mapang nung arishi küm 21 tain Ferro den khen danga asayadanga mali.
“La tanur ka dang lir aser la sempet tajung aketba asayar ka lir. Iba asaya kanga tasak liasü,” ta Muguruza-i asaya tembangba sülen ashi.
Lai taküm züngsema French open asayamung nung tasembuba round pongubenbuba atonga tongtetogo aser la taruba asaya Samantha Stosur mesera Anastasia Pavlyuchenkova den asayatsü.