French Open: Nadal-i shilem magitettsüsa akümer

Paris, May 27 (Agencies): Spain nunger tennis asayar mongin, Rafael Nadal-i tang tasayadak French Open asayamong nung shilem magitettsüa akümba osang ka tanü, Hokolbar nü metetdaktsüogo.
“Kü teka yiruba yong ni tan asayamong nung toktepa shilem magitettsüsa akümer. Iba ama tia tamajung ajuruba atema sasar saka iba ya taküm yimya ka lir,” ta taoba mapang French Open takok marok 9 ben tashi agizüksang, Nadal-i metetdaktsü.
Taoba mapang Grand Slam takok marok 14 tashi agizüksang, Nadal tekasa yirua, 2014 US Open asayamong nunga shilem magiteti süidakja liasü.
Tan asayamong nung 4 buba jenjang abensang, Nadal-i tanü 3 buba round asaya nung shilem magitettsüsa akümba ajanga külem sensopur, Marcel Granollers-i Nadal madak walkover yimya agi takok ngua pre-quarterfinal asayatsü jenjang ajangzükogo.
Tetsür singles shilem nung Romania tsür, Simona Halep-i points 4-6 6-2 6-3 agi Japan tsür, Naomi Osaka madak takok ngua tetsür singles 4 buba round-i tanü aiba osang jangjaogo.
Tan asayamong nung 6 buba jenjang abenla, Halep-i Czech Republic tsür, Lucie Safarova aser Australia tsür, Sam Stosur na rong nung takok angur den 4 buba round asayatsü.
Ano külen, India nunger Leander Paes aser Rohan Bopanna natia pei 2 buba round asaya koka tebur doubles 3 buba round-i tanü iogo.
Tan asayamong nung 6 buba jenjang abener, Bopanna aser Romania nunger Florin Mergea nati tanü points 6-3 6-4 agi France nunger Gregoire Barrere o Quentin Halys na madak takok angu.
Paes aser Poland nunger Marcin Matkowski natia points 6-4, 6-3 ngua Australia nunger Julian Knowle aser Germany nunger Florian Mayer na tsükdakja liasü.