French Open: Serena 4 buba round-i iogo

Paris, May 28 (Agencies): Tetsür defending champion, Serena Williams-i France tsür, Kristina Mladenovic madak takok ngua tang tasayadak French Open tetsür singles shilem indang 4 buba round asayatsü jenjang tanü, Honibar nü ajangzükogo.
Tanü tzünglu kanga sashia arua asaya tum nung aiben anentsüsa akümba yong America tsürla, Serena-i ghonda 2 ser tesadang ka shi nung ang points 6-4 6-6 ngua, Kristina 3 buba round nung tsükdaktsü.
Taoba mapang Grand Slam takok marok 21 tashi agizükla, Serena-i lar 4 buba round asaya Ukraine tsür, Elina Svitolina den asayatsü.
Tan asayamong nung 18 buba jenjang nung alila, Svitolina-ia points 6-4 6-4  agi 2008 champion, Serbia tsür, Ana Ivanovic madak takok ngua 4 buba round asayatsü jenjang ngua liasü.
Ano külen, India tsür, Sania Mirza aser Switzerland tsür, Martina Hingis nati par 2 buba asaya koka tetsür doubles 3 buba round asayatsü jenjang yashi, Hokolbar nü anguba osang jangjaogo.
Tan asayamong nung 1 buba jenjang abener, Mirza o Hingis nati yashi points 6-2, 6-0 ngua, Japan tsür, Nao Hibino o Eri Hozumi na madak takok angu.
Tetsür doubles World No.1, Mirza o Hingis nati par taruba asaya Czech Republic tsür, Barbora Krejcikova aser Katerina Siniakova na den asayatsü lemzükogo.