Friends of 80+ Kohima-i arishir 167 nem tetushi agütsü

Kohima, Rongchii (April) 30 (TYO): Kohima yimtsüng nung Friends of 80 plus telok tenteter küm 13 ajungba sentong ka ayongzüka amung.
Iba sentong ya Council Hall nung agi aser arishi küm 80 ser temapur nisung 167 nem tetushi agütsü.
Kohima yimtsüng nung tang arishi küm 80 ser temapur tebur 58 aser tetsür 109 lir.
Naga nunger sobaliba aser inyaksangshi nung taintem aser arishirtem akhümtsübutsü aser tushitsü sayur. Loktiliba nung taintem aser arishirtem alibaji temoatsü ka lir, ta sentong nung tenüng teta jaoker Tenyimia People’s Organisation tir, Timikha Koza-i ashi.
Mapang melenshia arudang, asenoki taintem aser arishirtem akhümtsübuba aser tushiba inyakyim sama odaktsür. Ajisüaka, Friends of 80 plus-i arishirtem tushia amshiba atema tenüngsang agütsür, ta Koza-isa ashi.
Iba sentong nung Visakuolie Suokhrie-i temoatsü meshia sarasadem aser arishir ajak nem sempet agütsüba den parnok ajak angati medical check-up liasü.
Sentong nung mendenji Vitsu Yhome liasü, Christ King Church Catechist, Ruokuovituo Robert-i temoatsü meshia sarasadem aser Vilakuolie Mere-i 2017-18 reoprt zünga metetdaktsü.