Frontier Nagaland Territory ken o tatemleni arur: CM Rio

Dimapur, Luroi/August 29 (TYO): Frontier Nagaland Territory (FNT) ken o tangatettep leni arur, ta Chief Minister Dr. Neiphiu Rio-i Hokulbarnü ashi.

Kohima nung sentong ka agiba mapang, tawa New Delhi nung central sorkar lenirtem den senden amenba nung Northeast atema home secretary aser joint secretary densema Ministry of Home Affairs (MHA) nungi delegates den tatsü-talang ajak jembi, ta pai metetdaktsü.

Iba sülen pa Delhi-i aoba mapang Union Home Minister küna kisüng ajuruteptsü sentong lir ta ashi. “State tsütsü nungi asenoki asen tangatetba jangjatepogo, anungji tatem kati arutsü asoshi tangbo parnok dak keta lir,” ta pai ashi.

Ano CM-i Northeast region nung handloom aser handicrafts sector nung pa convener asütsü mapa nungloktsü ta ashi, kong danga state indang chief minister tem aser DoNER minister züngsem ama alitsü. Iba sector tsütsü Nagaland tajungba nung tejakleni aoba mechi mapa mapa nungloktsü südi ta amanger, ta Rio-i ashi.

Züngsem state nungi submissions aser analysis ya October nungi tenzüktsü imlar, ta pai ashi.

Pai textile designers aser experts tem alitsüba, designs atema tribal hohos aser tetsür lokti tentet nungi temelaba agitsüba sentongtem lemsatep.

Quality control aser jenjang ateta azüoktsü asoshi yarn banks lapoktsüba indanga Rio-i ashi. “Nüburtemi yarn bank nungi yarns alitettsü, koba ajanga quality kisüng masü saka jenjanga junga meittsü. Iba ya ajanga commercial scale nung production tenzüktsü,” ta pai ashi.

Iba indang jembishinüba mapang lir aser Northeast states ajunga nungi proposal agüja asadanger ministry teyari nung policy renemtsü, ta ashi.

Südaker tem sen tajungba aazüka ibaji ajanga pei sasa pei peria alitsü asoshi südakba nung nisung timbai temulung agütsüdaktsütsü nükjidong nung iba ya inyaktsü, ta CM-isa ashi.