Froome-i 3 buba Tour de France akoktsüsa jenjang nguogo

Morzine, July 23 (Agencies): Tang tagidak 2016 Tour de France tetoktepba tembangtsü anogo ka anünga alidang agiba Stage 20 tetoktepba tembangba sülen Britain nunger cycle toktepa anishir, Chris Froome-i maneni overall shilem nung temaba jenjang ngua, Tour takok marok 3 buba agizüktsüsa tanü, Honibar nü jenjang tajung nguogo.
Tatembangba tetoktepba nung meimlaba tetsükdakba majurura, Froome-i 2016 Tour takokba angutsü aser iba takokbaji pai küm 4 tsüngda nung Tour takokba 3 buba agizüker alitsü.
“Ni yellow jersey semer Paris-i asüng, Deobar nü aitsü temeten nguogo. Tanü temaba jenjang anguba ya tan tetoktepba akokba den sako lir,” ta Froome-i metetdaktsü.
Froome-i tanü tetoktepba tembangba sülena minute 4 ser second 5 agi 2 buba jenjang nung alisang, France nunger Romain Bardet aser minute 4 ser second 21 agi 3 buba jenjang nung alir, Colombia nunger Nairo Quintana na den temaba jenjang ngua lir.
Tanü Col de Joux Plane nungi Morzine tonga kilometer 146.5 talang alizüngji Spain nunger Jon Izagirre-i mezüng tonga Stage 20 takokba ajangzük.
Tanü tetoktepba nung Izagiree sülen second 19 agi alizüng temonoba tonga Colombia nunger Jarlinson Pantano-i 2 buba aser second 42 agi temonoba tonga, 2014 champion, Italy nunger Vincenzo Nibali-i 3 buba jenjang ngua liasü.
2016 Tour de France tetoktepba ya Paris kübok Champ-Elysees nung asüng, Deobar nü tembangtsü.