Froome-i lendong ajuru; Yellow Shirt maneni asemtsü temeten angu

Mont Ventoux, July 14 (Agencies): Britain nunger cycle toktepa anshir, Chris Froome-i motorbike ka den tsüktepba lendong ajuruba ajanga tang tagidak Tour de France Stage 12 alizüng mezüng metongtettsüsa jenjang tamajung tanü, Brehostibar nü ajuruogo.
Tanü tetoktepba alizüng atongtsü kilomter 1 shi anünga alidang television atema noksa tangoker amenba motorbike kati külem Team Sky cycle toktepa anishir, Richie Porte dak tsükshi aser Porte sülen alisang, Froome-a idangji alanga liasü.
Yamaji lendong atalokba sülen Froome-i tejakleni asema oa cycle tanga ka meshizüker kilometer 178 talang alizüngji atong saka pai minute 1 ser second 30 shi mapang takoksa ajurutsüsa aküm.
Ajisüaka, pa lendong ajuruba ajiteta Froome nem overall shilem nung temaba jenajng anguri asemba yellow shirt maneni asemtsü maongka agütsütsü o bendang ka Tour de France tetoktepba obendangertemi agütsüogo.
“Tour de France tetoktepa o bendangertemi ni ajuruba timtem ajiteta kü nem yellow shirt maneni asemtsü maongka agütsüba atema kanga pelar,” ta Froome-ia tesülen pelaba olen ka metetdaktsü.
Tanü tetoktepba nung Belgium nunger Thomas De Gendt-i alizüng mezüng tonga Stage 12 takokba angu.