FTC nung tenüngsang agütsüba sentong agi

Dimapur, Yimpoksüi/November 19, 2019 (TYO): Faith Theological College, Dimapur ngutettsang, Principal Rev. Dr. S. Gangte 25buba Pastoral Silver Anniversary (1994 – 2019) aser 27buba Ministry Anniversary (1992 – 2019) ajungba nüngtem nung Honibarnü (16.11.19) FTC nung tenüngsang agütsüba sentong ka ayongzüka liasü.
Iba sentong nung Toshi Wungtung, Advisor IPR, SCERT & VG alaktetta tejaoker ama arugi aden aser Rev. Dr. Yiepetso Wezah, Auxiliary Secretary, Bible Society of India (BSI) Dimapur tongti o jembir liasü.
Sentong nungsa taoba MP (Rajya Sabha) aser Parliamentary Secretary, C. Apok Jamir den Arogo tenzükertem, Board members aser alaktetta tejaokertem aruagi denogo.
Rev. Dr. S. Gangte-i Pastoral Ministry nung küm 25 aser teaching ministry nung küm 27 tashi bendanga agüja inyakba atema, Toshi Wungtung-i pa dang pelaba metetdaktsü.
Tsüngremer tenzükba wadang nung ochishia aser bendanga agüja inyaktsü asoshi Toshi-i sentong nung adenertem ajungshia liasü.
Faith Theological College indang terenlok mapa atema tajungtiba inyaktsütsü asoshi Toshi-isa nagzüka liasü.
Maneni, senotong nung tongti o jembir, Rev. Dr. Yiepetso Wezah-ia, Rev. Dr. S. Gangte-i iba alizüng tongtetba atema tenüngsang agütsü aser temoatsü meshizüka sarasademja liasü. Rev. Dr. R. Meren Ao, Executive Secretary NBCA-i Toshi Wungtung, Nagaland Sorkar aser FTC atema sarasademtsü. Sentong nungsa, FTC kaketshirtemi ken balala aten aser choreography tsüngsang sayua liasü.
Sentong tenzüka, Er. Dr. L. Yezhekhu Sumi, Board Chairman-i telok pela agizük aser FTC Vice Principal, Julie Gangte-i tepela anküp o jembi. Sentong temer telok chiyongba mapang agi.