Pune, October 28 (Agencies): Tesüiba ita ishika linük nung mepetmesü adokba anema Bodhbar nü tamalen Film and Television Institute of India (FTII) nung azünger nüngtugu asemi National Awards meyipa agütsütsü telemtetba agiogo.
Maharashtra nungi Vikrant Pawar, Uttar Pradesh nungi Rakesh Shukla aser Goa nungi Prateek Vats nungeri parnoki agizükba award meyipa agütsütsü.
Film and Television Institute of India (FTII) kaketshirtemi anogo 139 tashi lungkak aita class nung medeni arur tang parnoki class nung adentsü ta sangdongba sülen iba sangdong tasen angashir.
Ajisüaka kaketshirtemi, Institute nung chairman atema Gajendra Chauhan shimba anema parnoki maneni lungkak aittsü ta shiogo.
Pawar-i pa indang film ‘Kaatal’ ajanga 2012 küm Best Short Fiction category nung President’s Gold Medal agizüka liasü, 2013 küm National Students Film Festival nung Shukla-i pa indang “Donkey Fair” film ajanga Special Mention Award agizüka liasü aser 2010 küm Vats-i pa indang film “Kal, 15 Aughust, Dukan Band Rahegi” ajanga Best Short Fiction nung Rajat Kamal Award agizüka liasü.
Pawar-i, tangbo onüktem ya FTII-i magizüktettsüsa kümogo aser iba ya ajanga linük nung primary level nungi tenzüka shisaliok mapatong ajak kongshir, ta ashi.
Linük nung tamangba lokti tsüngda tesempatep tensa aser shisashirtem tepsetba anema lungkak aita taoba hopta ishika tsüngda linük nung shisashirtem, kaket ken o zülurtem, sangro zülurtem aser mongintem aikati National Awards densema award aika meyipa agütsüdar.
You must be logged in to post a comment Login